Dili: Ministru Defeza ho komandu Polísia Nasionál Timór-Leste prepara ona konseitu destakamentu forsa F-FDTL hodi aprezenta ba konsellu ministru.
Ministru Defeza, Filomeno Paixão de Jesus, hateten, konseitu ne’e simu ona husi primeiru ministru, Taur Matan Ruak, maibé sei hetan aprovasaun iha reuniaun konsellu ministru hafoin implementa.
Governante ne’e argumenta, ezérsitu sira partisipa ona kursu kompletu iha área kursu soldadu, sarjentu, alferes, kapitaun, majór, koronél no kursu jenerál.
“Ha’u hatete ona militár mak prepara liu hodi hela iha fronteira tanba militár tuir kursu kompletu, kona-ba lideransa sira preparadu liu, ami tuur ona ho polísia depois mak ba aprezenta iha konsellu ministru oinsá mak atu koloka forsa iha liña fronteira” dehan ministru defeza Filomeno Paixão de Jesus.
Ministériu defeza konstrui ona kompañia militár ida iha área Dama-laran Munisipiu Bobonaro no ida seluk sei konstrui iha Maukatar munisípiu Covalima.
Tuir lei seguransa nasionál ho lei defeza nasionál fó dalan ba Falitil Forsa Defeza Timor-Leste F-FDTL hodi garante seguransa iha liña fronteirisa.
Antes ne’e, deputadu no sosiedade sivíl ezije ba primeiru-ministru atu destaka forsa F-FDTL iha liña fronteira sira hodi kontrola sidadaun ne’ebé tama sai ilegál liu husi liña fronteira.
Reportajen : Juvenal da Silva (010921)
