Opiníaun

Promesa Dialétika, Retórika ka Finjidu entre Horta no Lú-Olo?

Husi: Amito Qonusere Araújo

[OPINIAUN] – Hakerek ida ne’e refleta ba programa polítika atividade kampaña eleitóral entre kandidatu Prezidente da Repúblika Dr. José Ramos Horta no Dr. Francisco Guterres Lú-Olo, haleu territóriu Nasional, hodi husu apoiu sidadaun sira atu depozita votus hodi hetan konfiansa atu sai Xefe Estado, ema númeru un iha Paíz ne’e. Apoiu ne’e Hau konsidera nu’udar “esmola” ka tane liman ba povu sira, nune’e iha loron eleisaun, bele vota ba kandidatu ida, atu hetan vitória atu sai Xefe Estado. Situasaun ida ne’e laos buat foun ba povu sira, tamba kada tinan lima sempre akontese, hahu’u husi kampaña Prezidente da Repúblika no Eleisaun Parlamentar. Entre Dr. José Ramos Horta no Dr. Francisco Guterres Lú-Olo, sira naín rua iha istória luta ne’ebé diferente iha tempu pasadu, ohin no ba futuru. Timor-oan tomak, no komunidade internasional mos koñese hotu kandidatu naín rua ne’e, tamba ne’e la presija atu bele esplika detallu biográfia ida-idak.

To’o oras ne’e, ita hotu akompaña sira naín rua ninia komprimisu eleitóral; serake halo ajitasaun, propaganda, ka retórika wainhira hasoru malu ho povu sira iha kampaña eleitóral. Komísiu polítika durante sira naín rua hala’o hodi haleu Timor, ne’e tama iha kategória ida ne’e? Buat hotu sei malahuk hela?

Durante ne’e ita hotu akompaña sira nia komprimisu eleitóral iha komísiu polítika. Ida-idak aprejenta ninia programa ba sidadaun hotu mesak furak lo’os. Programa furak ne’e atu gaña votu, maibe perguntas, serake bele implementa ka lae, wainhira kandidatu hirak ne’e hetan konfiansa sai Xefe Estado durante mandate tinan-5. Iha fatin balun, sidadaun sira ne’ebé partisipa kampaña eleitóral, hamosu fali perguntas ba programa polítika ne’ebé sira rasik aprejenta. Ita fila-fali b alia-fuan tolu ne’e; ajitasaun, propaganda, ka retórika? Hau prefere atu insere termu retórika iha hakerek ida ne’e, hodi hakat lalais ba esplikasaun títulu iha leten. Tamba hakerek ida ne’e mos dala-ruma konsideradu hanesan retórika, tamba pensamentu ba esperansa ida sei namlele hela, ka sei metan, dala-ruma bele lo’os no dala-ruma mos la lo’os, mais pior liu mak da-ruma la kona, maibe tamba halo ánaliza, retórika bele sai lia-lo’os. Retórika ne’e akontese tamba nesesidade, maibe ho finalidade ho lolo’os, konsideradu Retórika rásiu iha prátika.

Baze fundamentu husi retórika iha debate públiku hatudu desde tinan rihun liu ba. Sientista Aristo Teles, Filosófiku Yunani Kuno ne’ebé moris iha decade rihun atus rua liu ba, ne’ebé esplika ho seriu kona-ba RETÓRIKA. Nia hakerek On Rhetoric, iha livru ida koalia espesífiku kona-ba RETÓRIKA no oinsa ninia prátika ne’ebé nunka halakon Wisdom [Prudente]. Tuir Aristoteles, Retórika produs lia-fuan ho nia frase ida [Eloquence], ho nia funsaun atu haforsa persuasaun ba debate ida. Retórika hafahe ba Dialetika ka Dialogostai ne’ebé bainbain uza husi Socrates wainhira hala’o dialogu one on one. Dialektika ho intensaun atu buka no hetan lia-loos, enkuantu Retórika atu haforsa no fiar metin públiku ba lia-loos ida.

Hau ho intensaun esplika oituan kona-ba konteúdu husi retórika ho ninia ramu sira, nune’e bele haforsa mos hau nia nia artigu ida ne’e, bazeia ba natureza polítika ne’ebé lao hela, hadulas rai Timor ne’e ho kandidatu Dr. José Ramos Horta no Dr. Francisco Guterres Lú-Olo nia programa ho kores oi-oin ne’ebé pinta husi ki’ik to’o bo’ot, hanesan fali Borboleta ne’ebé semo iha lorokraik, hobur ai-funan midar, wainhira loron matan atu mout iha lorokraik.

Antes atu tama ba títulu esensial kona-ba “Dialétika ka Retórika entre Horta no Lú-Olo”, esplika detallu programa prinsipal ne’ebé sira hato’o durante iha kampaña eleitóral no dialogu komunitáriu. Tamba ne’e atu esplika dala-ida tan kona-ba utilizasaun termu Retórika, ne’ebé hafahe ba parte hanesan Juíz (Courtroom speaking), Polítika (Political speaking) no fígura públika (Cerimonial speaking). Husi parte tolu ne’e, Juíz hanesan debate judisiariu atu foti desizaun ida, Polítika hanesan debate politizasaun atu halo influensia ba órgaun lejislador, no fígura públika hanesan ema sira ne’ebé atu hetan motivasaun no tane a’as tebes ho kontenti. Tuir Aristoteles, ikus liu ne’e halakon sesaun prudensia husi retórika.

Ho baze fundamentu simples ida ne’e, Hau atu tama ona ba komprimisu polítika ne’ebe kandidatu naín rua aprejenta ona ba povu sira. Tuir faktus hatudu, programa ne’ebé sira aprejenta, dala-ruma programa hanesan ho Órgaun Ezekutivu, Lejislador no Judisiariu sira nian, maibe Xefe Estado iha kompetensia bo’ot liu tuir Konstituisaun RDTL artigu 88 kona-ba Promulgasaun no Vetu. Ida ne’e mak direitu absolute Xefe Estado, tamba ne’e programa sira ne’ebé aprejenta iha kampaña eleitóral, sei sai nu’udar programa prinsipal Governu ninian, ne’ebé sei hetan aseitasaun husi Prezidente da Repúblika kuandu entre sira naín rua, ida eleitu.

Atu atinji metas ka objetividade husi komprimisu eleitóral, ne’e depende ba desizaun povu nian. kona-ba desizaun povu nian ne’e bazeia fali ba termu Retórika ne’ebé diak. Tuir Aristoteles, retórika presija atinji duni tipu lójika (Logos), étika (Ethos) no emosi (Pathos). Lójika iha ligasaun oinsa ho pozisaun sira ne’ebé utiliza hanesan material argumentu, no oinsa atu forma pozisaun hirak ne’e sai baze argumentasaun tui-tuir malu ho sistemátika no tama iha faktus nian.

Ita koalia kona-ba étika ne’ebé iha ligasaun ho fígura ba debate públiku, signifika figura refere tenke iha kredibilidade diak ka track record iha nível sosiedade la iha problema. La nesesita atu figura refere hala hala’o deklarasaun iha palku polítika mos povu sira depozita ona konfiansa; iha ne’e mak akontese ona válor moral, onestidade no integridade ne’ebé atinji duni ba fígura ida diak.

Iha artigu ida ne’e, Hau mos aprejenta konkordánsia Partidu CNRT ne’ebé apoiu kandidatu Dr. Ramos Horta ba Prezidente da Repúblika ho períodu tinan 2022-2027. Komprimisu hirak ne’e mak hanesan 1) Respeita no halo tuir deit saída mak Konstituisaun RDTL haruka, 2) Hatu’ur fila-fali ka Repozisaun Orden Konstitusional ne’ebé Partidu CNRT konsidera polítiku sira sobu no estraga tiha ona, 3) Hatu’ur hikas lejitimidade no dignidade órgaun Parlamentu Nasional, 4) Restaura fila-fali lejitimidade no funsiona hikas normalidade Governu ne’ebé la funsiona desde tinan 2020 hodi rejulta ekonómia rai laran lao hakdasak, 5) Reforma setór judisiariu, no 6) Prezidente da Repúblika labele sai fali opozisaun Governu, nune’e bele fo espasu ba Governu atu implementa polítika dada kadoras Greater Sunrise mai Timor Leste. Konkordánsia hirak ne’e mak kandidatu Dr. José Ramos Horta tula kedan iha kabas ho responsábilidade bo’ot ne’ebé tenke esplika ba povu sira iha baze, liu husi kampaña primeira volta to’o segunda volta. Laos Horta deit mak lori programa ne’e ba povu, maibe akompaña mos husi Prezidente Partidu CNRT Kay Rala Xanana Gusmão, hetan mos tulun husi Partidu ki’ik sira hanesan PD, PUDD, PDRT, Frente-Mudansa, no seluk tan, inklui mos hetan apoiu husi kandidatu balun ne’ebé hakneak kedan desde iha primeira volta.

Natureza polítika ho programa prioritáriu sira ne’ebé aprenjenta, tenke koalia lolo’os katak, povu sira la iha koñesimentu klean kona-ba ida ne’e, ne’e faktus, no labele nega. Lalika mos atu deklara katak, programa ka konkordánsia ne’ebé kandidatu Horta hulan, la signifika povu, militante no simpatijantes sira husi partidu CNRT ho nia forsa polítika sira, apoiu total, Hau hanoin ne’e mos LAE. Povu nia aseitasaun hodi depozita konfiansa ba Ramos Horta tamba hare’e ba fígura nasional Kay Rala Xanana Gusmão, nu’udar líder karismátiku, inklui mos ho Horta ninia fígura rasik.

Konkordánsia polítika ne’e tuir Hau nia hanoin katak, ne’e senáriu polítika ida ho importante tebes. Liga ba ne’e, presija tebes atu halo ánaliza tuir ókulu ema ida nian. Implementasaun ba komprimisu programa ne’e wainhira Horta eleitu sai Xefe Estado, Hau hakrak atu liga-fila fali mos kona-ba étika. Signifika atu dezenvolve elementu husi étika, presija ema ho intelijensia (intelligence), karakteristika (character) no intensaun diak (good will). Buat tolu ne’e nu’udar dignidade humanu, ne’ebé atrbui mos ba dignidade Ramos nian. Wainhira Nia la implementa konfiansa Partidu CNRT nia programa, ne’e hanesan traisaun bo’ot ida, no mais pior sei estrutura partidu CNRT, liu-liu Xanana Gusmão dala-ruma bele prega lia-fuan LA IHA ÉTIKA, TRAIDOR ba Horta. Kuandu ida ne’e akontese, étika fígura mundial Horta la iha ona válor iha povu nia matan.

Iha plataforma mídia Nasional no Internasional, Kandidatu Dr. José Ramos Horta sempre koalia bebeik kona-ba atu dada investidor Internasional sira mai halo investimentu iha rai laran, atu fo oportunidade ba joven sira atu servisu hodi hadia ekonómia família. Iha programa seluk ne’ebé importante ne’ebé sei implementa mak fo apoiu ai-han nutrisaun ba kosok-oan sira. Nia mos promete sei hala’o dialogu ho líder nasional sira, tamba lakohi atu Timor Leste nia líder sira iha inimigu ba malu, tamba rekonsiliasaun ne’ebé Timor Leste hala’o hasoru Indonézia hanesan ezemplu ida diak tebes ne’ebé nasaun seluk iha Mundu labele halo hafoin hakotu funu militar ka funu polítika. Programa sira ne’e atrai duni votantes sira, sira kontente, basa-lima ho ksolok wainhira partisipa kampaña eleitóral no dialogu komunitáriu ne’ebé kandidatu ho Xanana hala’o durante ne’e.

Tuir observasaun, sidadaun balun iha area remotes, mai partisipa kampaña Ramos Horta nian, laos atu rona programa, maibe atu mai hare’e ka hasai foto hamutuk ho kandidatu, liu-liu Kay Rala Xanana Gusmão, koñesidu ho naran AVO NANA. Tamba ne’e ho ánaliza katak, programa polítika entre Ramos ho CNRT ne’e senáriu nível superior. Povu la interese programa ne’e implement aka lae wainhira kandidatu Horta eleitu sai Xefe Estado. Maibe povu ninia interese, saida mak Xanana planeia no ba implementasaun ne’e aseita ka afavor, katak la iha objesaun atu kontra.

Arkiva barak ona kona-ba deklarasaun polítika kandidatu Ramos Horta nian. Maibe kandidatu Dr. Francisco Guterres Lú-Olo mos iha programa importante ne’ebé kompromete mos ba sidadaun sira, liu-liu apoiante, militantes, simpatijantes sira husi partidu Fretilin, PLP no KHUNTO liu husi Plataforma de Entendimentu. Partidu tolu ne’e iha Komprimisu Polítiku ne’ebé públika iha loron 08 fulan Abril tinan 2022 ne’ebé asina husi Koordenador, atúal Secretáriu-Jéral Partidu Fretilin Dr. Marí Alkatiri.

Hare’e ba realidade Timor Leste nian no ho konsiderasaun katak funsionáriu públiku sira, tinan-tinan simu pagamentu estraordináriu ba salariu fulan ida adisional, (Dekretu Lei 29/2021 husi 09 de Dezembru – Aprova pagamentu extraordináriu de um mês de salario adicional), maibe maioria populasaun sei moris ho kondisaun ekonómika ne’ebé hasoru dezafius oin-oin no bo’ot.

Nune’e, plataforma Entendimentu simu proposta husi Sua Exelência Presidente da República ba sua Exelência Primeiro Ministro atu kria subsidiu ba uma kain hotu-hotu ba fulan ikus tina-tinan kompromete atu, hahu’u iha fulan Dezembro 2022, VIII Governu Konstitusional atu aprova Lei hodi implementa polítika justisa social ida ne’e hodi atribui subsidiu iha fulan Dezembro kada tinan, ho válor “dolar atus rua” ($ 200), ba uma kain ida-idak iha Timor Leste laran tomak.

Nune’e plataforma de Entendimentu konkorda ho polítika ida ne’e no sugere mos atu polítika ida ne’e tenki inklui mos veteranos ho família ho pensaun decimo-terseiro kada tinan.

Komprimisu ida ne’e ho hanoin atu bele tulun maluk sira hotu atu iha kondisoens netik atu bele selebra espoka festivas ho ksolok no dame hamutuk ho família no amigus.

Viva RDTL!

Viva Povu Doben Timor Leste!

Onra no Glória ba Mártires no Eroi Pátria Timor Leste nian!

Ho komprimisu entre kandidatu Ramos Horta ho Partidu CNRT, no Plataforma Polítiku Partidu Fretilin, PLP no KHUNTO, konsideradu nu’udar komprimisu polítiku ho Dialétika ka retóriku. Hau hanoin katak, ne’e komprimisu dialétika, tamba plataforma polítika ne’e tuir loloos bele implementa ona, tan partidu tolu mak oras ne’e involve no forma Governasaun; katak sira iha kompetensia atu ezekuta. Maibe plataforma ne’e mosu iha kampaña eleitóral, entaun ita deskonfia buat balun katak, dala-ruma bele realiza ou lae? Hau fiar metin katak ne’e retórika deit, no finje la hatene hotu.

Rajaun Hau prega Finjidu ba kandidatu Prezidente da Repúblika, tamba sira hatene kondisaun ne’ebé nasaun infrenta, liu-liu dezenvolviimentu infra-estrutura bázika, problema edukasaun, saúde, eletrisidade, be’e mo’os no seluk tan, maibe finji la hatene. sira kari ai-funan ba povu nia matan ho komprimisu oi-oin. Sira kanta bebeik atu hadia povu nia moris, maibe realidade nunka hatudu prátika. Durante períodu governasaun, promesa mak barak liu, finji la hatene, la rona, la hare’e problema ne’ebé povu infrenta. ida ne’e mak susar, nune’e sira nia retórika ne’e baratu liu fali barata. Povu tanis, líder sira triste maibe fuan dehan ho votus, ita apoiu. Tamba ne’e, lia-fuan ida ne’ebé bain-bain ema koalia dehan LIAN POVU, LIAN MAROMAK. Termu ne’e vale duni, maibe vale iha tempu kampaña no eleisaun. LIAN POVU sei la vale, wainhira líder sira hahu’u ukun ona, hetan ona poder, mehi atinji ona, LIAN POVO nakfilak sai LIAN DIABU. Tamba ne’e, sidadaun hotu-hotu tenke deside no fihir didiak kandidatu ida ne’ebé hadomi Povu, sai Prezidente ba Povu tomak, no labele Prezidente ida ne’ebé hatudu nia egoismu ba interese partidária no organizasaun polítika seluk tan.

Iha artigu ida ne’e, Hau mos lamenta deklarasaun husi Timor-oan sira ne’ebé input alia-fuan Mistisu no Maubere oan ka Paun no Kumbili ba kandidatu Prezidénte da Repúblika Dr. José Ramos Horta no Dr. Franisco Guterres Lú-Olo. Lia-fuan ne’e provokativu, lia-fuan diskriminativu, no hamosu rasismu ba Timor-oan tomak, no termu ne’e mak bele harahun Timor-oan ho hun ida, abut ida ne’ebé metin lo’os ho kulturalmente husi tempu pasadu nu’udar identidade feton-san umane. Hau hanoin katak, kandidatu naín rua ne’e Timor-oan. Sira nia kontribuisaun ba luta libertasaun nasional bo’ot tebes. Tamba ne’e tenke evita ho lia-fuan diskriminativu ne’e, tamba estraga relasaun Timor-oan tomak nian. tenke komunga Partidu PD nia moto katak, Timor Leste ba Timor-oan tomak, hun ida, abut ida.

Ita fila-fali ba tópiku husi artigu ne’e katak, Dialetika, Retórika ka finjidu entre Horta no Lú-Olo. antes atu konklui, dala-ida tan hateten katak, signfikadu husi Dialetika ne’e mak intensaun atu buka no hetan lia-loós. Ho signifiika ida ne’e, hamosu perguntas iha Hau nia kakutak katak, serake Ramos no Lú-Olo ninia programa sira ne’e ho intensaun atu buka no hetan lia-loós. Buka – keridijer ke kandidatu ida-idak ba buka votus, buka simpatia povu nian, nune’e bele depozita konfiansa ba eleisaun atu hetan vitória. Lia-loos mak povu sei hatudu iha eleisaun. Agora koalia kona-ba Retórika mak atu haforsa no fiar metin sidadaun sira nian ba lia-loos ida. Lia-fuan Haforsa, hau halo sondajen observasaun ida katak, Haforsa no Fiar metin ne’e atu kandidatu naín mantein deit sira nia programa. Kandidatu naín rua hanoin katak, ho programa ne’ebé aprejenta ne’e iha isin no klamar, no bele konsidera hanesan programa ida ne’ebé la iha foer. Tamba ne’e sira tama sai munisípiu, lalin sidadaun sira iha area remotes, hodi mai rona kandidatu ida-idak ninia programa. Tamba ne’e, komprimisu Partidu CNRT ho Ramos Horta, no Plataforma de Entendimentu partidu Fretilin, PLP no KHUNTO ho Lú-Olo ne’e hau konsidera RETÓRIKA deit. Retórika tamba sira fiar metin deit ba programa longu-prazu ninian, programa esperansa ninian katak, bele implementa ka lae? Tamba programa ne’e dala-ruma bele implementa no dala-ruma mos lae, tamba ezekusaun programa ne’e integra mos ho kompetensia órgaun Estado ida-idak nian. kandidatu naín rua mos komprende muito-bém kona-ba konseitu Estado, kompetensia Xefe Estado nian, no hatene mos servisu órgaun Estado nian, maibe sira naín finje la hatene, tamba deit atu hetan konfiansa husi Povu sai Xefe Estado, matenek no komprensaun, intrepretasaun klean ne’ebé iha, sai brinkedus durante fulan hirak nia laran, tamba hatene saída mak sira atu halo.

Iha fatin-fatin, sidadaun sira intrepreta nune’e, dala-ruma bo’ot sira mai hala’o kampaña atu buka deit ita nia votus, maibe liu tiha ida ne’e, haluhan ona, ka hanaran la realiza. Husi hanoin hirak ne’e, lo’os duni…tamba faktus hatudu, sira nia prezensa iha area remotes ne’e iha mumentu ba hala’o esmola ka tane liman ho votus. Tamba ne’e Lian povu ne’e Lian Maromak, ka Vox Populy, Vox Dei. Nune’e, deklarasaun retórika ho eskrita no oral ne’ebé hato’o husi kandidatu Prezidente da Repúblika ne’e pertinente tebes. Sira sai anju, inosente ba sala laek sira, no sira sai liurai, gosta hatun ema ida, no hasae ida seluk. Ida ne’e hatudu katak ne’e polítika la edukativu. Jerasaun foun aprende atuasaun polítika ne’e nu’udar material, maibe labele aplika iha konseitu estado tamba konsideradu nu’udar polítika interese poder.

Atu termina, dala-ida tan alerta katak, programa polítika kandidatu Prezidente da Repúblika ne’e retórika deit ka ho argumentu ne’ebé resin, no bain-bain ema bolu dehan NATO [No Action Talk Only – La iha Asaun Koalia deit]. Termu ne’e akontese barak liu husi polítiku naín sira nia le’et. Koalia hela deit to’o lingua hotu, ikus mai nervozu rasik, ikus mai trata ema, defama ema ka prega ho lia-fuan permatura sira, la lójika. Natureza polítika Timor nian ne’e hanesan fali polítika dezastre natural. Tamba ne’e desizaun ba eleisaun Prezidénsial ne’e hanesan referendum ba povu. Povu sira sei hato’o sira nia votus ho VOX POPULY, VOX DEI ho livre no sekreta. Iha pepatah ida dehan nune’e “ó atu kaer manu ida labele duni, tamba manu sei fuik no labesik ó, maibe hamaus nia ho nia hahan, manu ne’e sei maus no ó sei kaer, no dala-ruma ó sei kaer hotu nia maluk”. Termu ida halo ánaliza katak, kandidatu ka partidu polítiku sira nia prezensa iha komunidade nia le’et wainhira besik eleisaun. Perguntas: tan-sá antes eleisaun, labele hakbesik a’an ba povu, hala’o dialogu atu konfiansa ne’e kesi metin kedan iha ne’ebá, duke besik eleisaun mak ba aprejenta programa, ne’e konsidera nu’udar komprimisu ka propaganda barata, maibe tamba interese ba poder; atu iha anin bo’ot, udan ka loron-manas, luta nafatin hodi ba hasoru populasaun sira ho retórika no finjidu.

Husu ba povu tomak, ita nia lian, lian Maromak, lian esperansa, lian sagradu, no lian determinante. Tetu didiak, sukat didiak, fihir didiak, tuir LIAN MAROMAK nian, nune’e lian sei la sala, lian sei la mout, lian sei la tanis. Votu ida, deside distiñu nasaun, moris oan, bei-oan nia futuru, hodi tane no dignifika rai lulik, rai Timor nia riku. Tamba ne’e atu termina, Hau konklui katak, programa sira ne’ebé kandidatu Prezidénte da Repúblika ida-idak aprejenta, tenke benefísia ba povu no nasaun, no labele uza povu nu’udar instrumentu polítika hodi hetan poder, tamba intensaun ida ne’e nu’udar malisioza ba futuru, ba jerasaun tuir mai. Hamutuk ho Povu RDTL, sei salva Estado. Viva RDTL, Viva Povu Maubere, Viva Éroi sira !!! SHALLOM [REMATA].

Hakerek naín hela iha Bairo Puasoru, Aldeia Chai, Suku Loré Postu Loré Munisípiu Laútem.

Númeru kontaktu [+670] 7763 9282, E-mail amitortl@gmail.com

Show More

Related Articles

Leave a Reply

Your email address will not be published.

Back to top button