Magazine RádiuNotisiasTetum

Amu Pároku Venilale Hasa’e Kustu Renova Sertidaun Ba $30, Amu Vigario Baucau : Renova Sertidaun Ne’e $2 De’it

RTTL – Baucau: Sarani katólika iha parókia Venilale munisípiu Baucau sente preokupadu ho amu pároku Venilale nia desizaun ne’ebé aumenta kustu renovasaun sertidaun batizmu no kazamentu husi dolar lima to’o dolar tolu-nulu ($5-$30).

Kliente, Humberta Matos Perreira, justifika, trata sertidaun batizmu no sertidaun kazamentu foun, selu de’it dollar lima, maibé atu halo renovasaun tenke selu dolar tolu-nulu.

“Ita foti foun ne’e selu lima dolar, maibé sala uitoan iha naran ka vírgula ruma atu hadi’a ne’e tenke seluk tiga-puluh dolar. Ha’u sente triste tanba loron ida ita bele gasta osan barak ne’e” Humberta preokupa.

“Hau oan nain rua nia naran mak sala. Ha’u tenke hadi’a para labarik naran rua ba primeira komuñaun. Maibé selu kedan dolar 30” kliente, Maria Angela da Crus, hato’o preokupasaun ne’ebé hanesan.

Iha parte seluk, padre Vigario Paroquia Katedral Santo Antonio Baucau, Manuel da Silva Ximenes Sdb konfirma, kriteira husi dioseze Baucau atu trata serstidaun foun selu dolar lima kada ema ida, no atu renova halo de’it karta rekerimentu ho osan dolar rua.

“Desizaun husi Dioseze ne’e, halo foun selu dolar lima, renova ne’e halo rekerimentu maibé selu dolar rua. Maibé karik parókia balun ne’ebé seluk liu standar bele fó hatene ha’u hanesan vigáriu” dehan nia.

Relasiona asuntu ne’e, Amu pároku Venilale, Carlos Fernandes Sdb, rejeita fó komentáriu tanba la hetan autorizasaun husi Dioseze Baucau.

“Ha’u komenta kona-ba asuntu ne’e (kona-ba kustu) sertidaun tanba la iha autorizasaun husi dioseze Baucau” nia rejeita.

Reportajen : Pedro Almeida 080722

Show More

Related Articles

Back to top button
error: !