Dili – Governu aprova sosa produtu nasionál iha ámbitu kontratasaun públika.
Proposta ne’e, aprezenta husi primeiru-ministru Taur Matan Ruak ne’ebe hetan aprovasaun iha reuniaun konsellu ministru, iha kuarta-feira ne’e.
Portavoz governu Fidelis Leite Magalhaens esplika, diploma ne’e estabelese obrigatorio atu sosa husi administrasaun direta no indireta estadu nian atu sosa sasan ne’ebé prodúz iha Timor-Leste.
Objetivu husi medida hirak ne’e, atu garante uma-ka’in sira ne’ebé mak ekonómikamente mukit tebes sei la lakon asesu ba aihan, rezultadu husi aumentu signifikativu iha ninia presu.
Ho forma ne’e, estadu propoin atu ezekuta konjuntu medidas ne’ebé aumenta konfiansa ba operadór ekonómika sira, liuliu ba agrikultór, atu aumenta produsaun nasionál ba produtu agríkola.
Alem de ne’e, konsellu ministrus aprova projetu dekretu-lei, ne’ebé aprezenta husi ministru ensinu superiór, siénsia no kultura, Longuinhos Dos Santos, kona-ba medida apoiu ba estabelesimentu ensinu superiór privadu atu asesu ba internet.
(Domingos/Siso)
