Hekerek Naín: Amito Qonusere Araújo
[OPINIAUN] – Artigu neé refleta ba situasaun polítika neébe iha inserteja nia laran, nuneé líder nasional hirak neébe mensionadu ho influensia polítika no sosiu kultural, no mundial atu hamutuk dala-ida tan hodi lori Timor ba oin.
Sidadaun Timor oan tomak hein esperansa foun ida neé. Esperansa ida ke la imajina atu akontese, atu bolu malu líder Nasional hanesan Kay Rala Xanana Gusmão, Dr. José Ramos Horta, Marí Alkatiri, Taur Matan Ruak, Lere Anan Timor, Francisco Guterres Lú-Olo, kaer liman malu, hase malu, hodi nahe biti boót hodi halaó dialogu, nuneé bele solusiona ona dezentendimentu neébe akontese entre sira, no fo perdaun ba malu, atu hamutuk dala-ida tan, hodi lori Timor Leste ba oin atu hadia Povu nia moris.
Durante periodu kampanha eleitóral, sira hirak neé fahe ba malu, hodi apoiu ba kandidatu Prezidente Repúblika ida-idak. Xanana Gusmão apoiu kandidatu Dr. José Ramos Horta, ho forsa polítika Partidu CNRT, no partidu kiík seluk tan, no Marí Alkatíri no Taur Matan Ruak apoiu kandidatu Francisco Guterres Lú-Olo, liu husi forsa polítika partidu FRETILIN no PLP, inklui Partidu KHUNTO. Líder nasional hirak neé iha programa polítika diak, atu hadia povu no nasaun, maibe diferensia partidaria, diferensia egoismu mak hafahe ona sira nia prinsípiu da luta libertasaun nasional. Uluk la iha ema ida mak atu hafahe sira, maibe poder mak ohin loron halo katuas sira lao la loós hotu, halo sira lao ketak-ketak.
Neé karta ida, maibe laos karta formal, karta sentimental nuúdar sidadaun ba ninia líder sira. Dala-ruma kolega balun bele kestiona konteúdu karta neé, tamba konsidera karta arbiru, maibe Hau empresa lia-fuan Suekarno nian katak ” lebih baik menyuratkan kepada pemimpin negara untuk masalah negara, dari pada diskusi untuk menjatuhkan mereka”. Tamba neé mak karta neé bazeiandu ba sentimentu nasionalismu. Ambisaun karta neé hanesan fanun sira nia neon, sira nia fuan.
Karik karta neé sira la konsege leé, maibe hau fiar metin katak natureza Timor nian, matebian sira, éroi sira mak sei hulan toó sira nia mehi kalan, fo imajinasaun iha sira nia atividade diaria, sira nia viajen, sira nia lao, sira nia oras deskansa toó sira nia tilun, borus toó fuan, hodi tatoli katak, emar kiík hakarak imi hamutuk atu lori nasaun neébe ulik imi luta ho sofrimentu oi-oin toó hetan ukun rasik áan.
Igreja Katólika nia papel importante ba konstrusaun Estado. Padre no Madre sira, Bispo mak iha poder relijiozu atu bele organiza dialogu espiritual, bolu líder nasional sira atu hamutuk, nuneé bele solusiona dezentendimentu neébe iha, atu lori Estado tomak sai husi konflitus sosial, konflitus psikolójiku no seluk tan.
Dala-ida tan, Hau fiar metin katak, surat neé toó ona Líder nasional nia matan, ho tulun husi natureza Timor. Rai neé labele ona atu tolera sira nia diverjénsia polítika, maibe tenke iha prinsípiu ida deit katak, luta ba Timor Leste neé nakonu ho terus no susar, kontribuisaun ema hotu-hotu nian, ho nia finalidade mak Timor Leste hetan ukun rasik áan.
Artigu nee simples tebes, maibe ho espirítu Nasionalismu. Loron kalan, tinan bain-loron, mak jerasaun foun sira hewai balu, trata malu, sadik malu tamba deit interese ideolojiku, interese partidarismu, hodi fahe malu, maske sei bolu malu maun alin, kamarada, kompanheiru, kompatriota, no Belun, maibe tamba pider no finanseira, soran tiha katuas sira, halo sira hadok malu tiha, halo sira ho sira krítika malu, mais pior liu tan deit ego jerasaun foun nian, halo katuas sira se kotuk ba malu, hodi la interese ona povu tomak no nasaun nia distinu. Ita hotu nia preokupasaun mak toó tempu toó dadauk, sira seidauk kuda unidade, seidauk rejolve problema, mak siranhakat ba mundu seluk, neé hanesan tula hela todan boót ida, iha jerasaun foun nia kabas, kuandu rejolve no la hetan solusaun, povu no nasaun neé tanis, no éroi no saudozu sira triseltr, ikus mai dignidade estado monu leét deit.
Tamba neé, jerasaun foun, tenke buka alternativa no meius oi-oin, atu bolu sira, liu husi apoiu Konfisoens Relijiozu sira, organizasaun rejisténsia, sivitas akadémika, juventude atu organiza, bolu sira, halaó dialogu, tuir lisan Timor nian.
Uluk sira hamutuk, lia la kona nasaun neé. Sira nia hamutuk, Timor neé midar hanesan bani-beén, hanesan masin-midar, hanesan mos ai-funan, neébe ema hobur. Signifika komunidade Internasional gosta no hakarak mai Timor, atu pasiar, haree paisajen furak Timor nian, atu sente rejultadu ukun áan nian. Maibe ohin loron saida mak akontese; Timor la midar ona, tamba diverjénsia polítika husi líder sira, ema tauk mai, liu-liu investidor internasional sira hatauk áan tamba lakohi atu sai vítima iha loron ikus.
Loron 19 fulan abril tinan 2022, loron importante tebes, loron neébe haburas demokrásia, liu husi eleisaun Prezidénsial, hodi hili fila-fali Prezidente da Repúblika foun períodu 2022 toó 2027. Se mak sai PR, Xefe Estado ida ba Povu tomak. Tamba neé vota ho konsiensia, vota livre, maibe vota maduru, tamba votu ida, kontribui ba estabilidade nasional.
Parabéns ba povu RDTL
Viva Líder Nasional
Hakerek Naín hela iha Bairo-Puasoru, aldeia Chai, Suku Loré Postu Loré Munisípiu Laútem, númeru kontaktu [+670] 77639282, E-mail: amitortl@gmail.com
