Dili – Polísia Nasionál Timór-Leste-PNTL liu husi unidade polísia marítima kaptura sidadaun na’in lima (5) ne’ebé hatama sigarru joker ‘karton’ haatnulu ho ilegalmente mai Timór-Leste.
Unidade polísia marítima kaptura infrator hirak ne’e iha área Kristu Rei, tersa-feira mais ou menus oras tuku rua madrugada.
Portavós komandu jerál PNTL, superintendente xefe Arnaldo de Araújo, hateten, infratór hirak ne’e kompostu husi sidadaun indonézia na’in ida (1) no timoroan na’in haat (4).
“UPM halo patrullamentu iha area cristo rei dolokoan no konsege kaptura ema na’in haat ne’ebé hatama sasán ilegál. Total ema na’in neen (6) maibé na’in rua (2) halai” dehan portavós.
Sorin seluk, komandante unidade polísia marítima superintendente, Basilio de Jesus, konfirma, autór na’in lima sei submete ba kumpre oras 72 hafoin submete ba primeiru interrogatóriu iha tribunal distritál Dili, tanba tuir nia “tranzasaun ilegál” ne’e krime.
Evidénsia ne’ebé unidade polísia marítima prende maka hanesan, ró ida, sigarru karton haatnulu (400) kareta rua ho motorizada Honda beat ida.
Antes ne’e, sidadaun no inisiál ADJ hala’o ona atividade ilegais hanesan hatama motorizadas, mina rai, sigarru, no nia mós konsege esporta ai-kameli, Sagiko ba indonézia liu husi dalan ilegál.
Sidadaun na’in lima ne’e, ho inisiál hanesan RDC, RGM,ADJ, JM timoroan no sidadaun inisiál CM hanesan sidadaun Indonézia ne’ebé hela iha Atapupu.
Reportajen : Juvenal da Siva (310821)
