Dili – Polisia sientifika investigasaun kriminal-PCIC detein ona suspeitu inisial LM tamba rai kilat iha nia residensia.
Investigador PCIC, Floriano Serrano hateten, suspeitu LM iha provas sufisiente ba krime uza armas proibidu.
Tamba ne’e, bainhira PCIC apresenta auto nutísia ba ministériu públiku no ministeriu publiku aseita ona hodi detein suspeitu LM durante oras 72 nia laran hafoin apresenta ba primeiru interogatóriu iha tribunal.
Evidensia armas proibidu sira ne’e kontinua asegura hela iha edifisiu pcic hodi reforsa investigasaun.
Ekipa konjunta kompostu husi S2 polísia militar, N2 naval F-FDTL no PCIC kaptura suspeitu LM iha segunda-feira madrugada semana ne’e iha Loes, postu administrativu Maubara, munisípiu Likisá.
Hafoin ne’e, ekipa konjunta halo buska ba LM nia rezidénsia no identifika kilat lolon tolu ho tipu M16, J3 no pistola glock 19 ida no rama automátika ida inklui munisoens ba armas refere.
Dadaun ne’e, arguidu lm detein hela iha sela PCIC durante oras 72 hafoin submete ba primeiru interogatoriu iha tribunal distrital Dili.
(Juvenal/Siso)
