Dili – Kardeal Virgilio Do Carmo Da Silva sei hala’o ninia funsaun servisu hanesan kooperador direitu ba Amu Papa no sai mos hanesan xefe igreza universal, iha Vatikanu-Roma.
Chanceler arkidioseze Dili padre, Paulus Maya hateten, kuandu ema ida sai ona kardeal iha ona kompetensia hili Amu Papa no asume mos kargu importante sira iha Kuria Romana.
Nia akresenta, karik Kardeal Virgilio hetan konfiansa husi Kuria Romana asume kargu importante ruma, tenke husik kargu arsebispu hodi ba estadia iha vatikanu.
Padre Paulus Maya konfirma, dau-daun ne’e Kardeal Dom Virgilio Do Carmo Da Silva kontinua asume kargu arsebispu metropolita Dili, tanba seidauk asume kargu ruma iha Kuria Romana.
Serimonia konsistoriu sai Kardeal Virgilio Do Carmo Da Silva, realija iha loron rua nulu resin hitu, fulan agostu tinan ne’e, iha Vatikanu.
Kardeal dahuluk Timor-Leste nian, sei fila mai Timor-Leste iha loron lima no sei halo misa selebrasaun iha loron nen fulan setembru ne’e.
Dau-daun ne’e, komisaun organizadora hahu halo preparasaun hodi simu Kardeal Dom Virgilio Do Carmo Da Silva.
(Bitu/Siso)
