Rttl-Manatutu – Sala maternidade Natarbora munisipiu Manatutu menus (krize) silindru oksijéniu iha sala maternidade hodi atende pasiente durante fulan ida, maibé saúde munisípiu Manatutu seidauk rezolve.
Parteira sentru maternidade Natarbora, Silvina Guterres informa, iha sentru maternidade, oksijéniu ki’ik iha rua, maibé gas laiha, difikulta inan isin rua no bebé ne’ebé presiza oksijéniu.
“Difisil atende pasiente ne’ebé presiza oksijéniu tanba daudaun ne’e, sentru saúde iha de’it oksijéniu boot ida” parteira hato’o nia preokupasaun ba jornalista RTTL iha sala maternidade, 300922.
Problema ne’e hato’o ona ba dirijente saúde munisipiu Manatutu maibé seidauk bele rezolve tanba, Xefe Sentru Saúde Natarbora, Casmiro Gomes, hatete la iha transporte hodi tula silindru oksijéniu husi Manatutu ba Natarbora.
“Ha’u hato’o prospota ona. Maibé karreta la iha atu tula slindru oksijéniu ba Natarbora la iha” nia preokupa.
Entretantu, tuir informasaun ne’ebé RTTL asesu, husi Janeiro to’o Setembru 2022, bebé 50 mak moris iha sala maternidade no inan isin-rua nain 8 transfere ba Ospitál Nasionál Guido Valadres.
To’o notísia ne’e publika, jornalista RTTL, tenta konfirma responsavel saúde munisipiu Manatutu maibé la atende telefone.
Reportajen : Aurelia, jornalista destakada Manatutu.
