Dili – Ministeriu publiku alega prizaun preventiva ba arguidu nain 23, ba kazu homesidu simples, iha Dare.
Advogadu privadu, Jeronimo Piedade Da Silva rekoñese, arguidu balun envolve direta, iha konfrontu ne’ebe akontese iha aldeia Fatunaba, suku dare hodi rejulta vitima Clementino Borges lakon vida.
Prokuradór Domingos Barreito, iha nia alegasaun husu ba tribunál atu aplika medida prizaun preventiva ba arguidu 23 no aplika medida koasaun termu identidade no rezidensia ba arguidu nain hát, ho inisial TSL, ES, CC no HCS tanba la envolve iha kazu homesidu refere.
Maske nune’e, advogadu privadu sei iha prazu loron sanulu resin lima hodi halo rekursu kontra desizaun tribunal nian.
Durante julgamentu, ministeriu publiku imputa arguidu sira ho krimie homesidu simples tamba halakon vítima Clementino Borges nia vida.
Konfrontos jovens sira ne’e, akontese iha loron kinta-feira madrugada semana liuba.
Julgamentu primeiru interogatoriu ne’e, prezide husi juiz singular Afonso Carmona, ministeriu públiku reprezenta hosi prokuradór domingos bareito no arguidu sira hetan asistensia legál husi advogadu ptivadu nain haat.
(Juvenal/Siso)
