RTTL.EP (RAEOA) – Iha tinan 2015, Ministériu Turizmu, governasaun da-hitu (VII) kontrata kompañia Damenia,Unip.Lda no Morison, Unip.Lda hodi konstrui jardín Oebau no jardín Lifau, ne’ebé lokaliza iha Rejiaun Administrativa espesiál Oé-cusse Ambenu, no Zona Espesiál Ekonomia Merkadu Sosiál (RAEOA/ZEEMS), sub-Rejiaun Pante Makassar, maibé, konstrusaun ba obra rua ne’e, paradu durante tinan hitu, tanba kompañia konstrutora abandona.
Konstrusaun Projetu Jardín Oebau hahú iha loron 20 fulan 04 tinan 2015, responsabiliza husi kompañia Damenia,Unip.Lda ho montante orsamentu $.1.400.000. Enkuantu projetu monumentu jardín Lifau, konstrui husi Kompañia Morison, Unip.Lda. ho montante orsamentu $.1.400.000. hahú nia konstrusaun iha fin de Janeiru 2015 maibé to’o agora seidauk finalize.
Tuir dokumentu kontratu ne’ebé jornalista RTTL,ep asesu, loloos, konstrusaun monumentu jardín Lifau finaliza iha fulan Outubru tinan 2015. No konstrusaun Jardín Oebau, loloos, finaliza iha fulan Novembru tinan 2015.
Rekorda katak, projetu konstrusaun ne’e, responsabiliza husi Ministériu Turizmu, ne’ebé lidera husi Francisco Kalbuady Lay, governasaun da-hitu.
relasiona ho jardim ne’ebé abandonadu, Vise-Primeira Ministra no Ministra Solidariedade Sosiál no Inkluzaun, (V-PM-MSSI), Armanda Berta dos Santos, hateten, governu sei koordena ho autoridade Rejiaun Administrativa Espesiál Oe-cusse Ambenu (RAEOA) hodi buka solusaun ba projetu konstrusaun jardín rua ne’ebé abandona.
“Ha’u sei koordena ho prezidente autoridade RAEOA hodi hare took asuntu ne’e (projetu jardín) iha futuru, ha’u fiar katak, prezidente RAEOA sei hadi’a” Armanda Berta dos Santos, garante.
Prezidente autoridade Rejiaun Administrativa Espesiál Oé-Cusse Ambenu, no Zona Espesiál Ekonomia Merkadu Sosiál (RAEOA/ZEEMS), Arsénio Paixão Bano, esplika, projetu konstrusaun monumentu Jardín Lifau ho Jardín Oebau oras ne’e abandona tanba problema iha governu anterior (governasaun partidu Conselho Nasionál Rekonstrução Timorense-CNRT), maibé autoridade Oe-cusse enkaixa ona iha planu no halo re-dezeñu hodi hadi’a iha tinan oin.
“Jardim Oebau ho Lifau ita tau sai pakote ida ba planu ba tinan oin, maibé iha hela kazu, kuandu kazu ne’e rezolvidu ita bele hadi’a. Ida tan ba jardín Lifau ita sei halo re-dezeñu hodi hadi’a di’ak liu iha futuru” dehan Arsénio Paixão Bano.
Maske nune’e, prezidente RAEOA la esplika detallu kona-ba kazu ne’ebé impede prosesu konstrusaun jardín rua refere.
Tuir observasaun RTTL iha projetu konstrusaun jardín Oebau, kadeira ne’ebé halo ho simentu tohar hotu ona, trotoar ne’ebé kria iha jardín laran mos kondisaun aat hotu, ahi ne’ebé instala iha jardín laran, la funsiona.
Enkuantu iha monumentu Jardín Lifau didin hale’u hela ho kaleen maibé konstrusaun uma iha jardín laran paradu hela.
To’o notísia ne’e publika, RTTL seidauk halo konfirmasaun ho eis Ministru Turizmu iha governasaun da-hitu nian, no proprietáriu kompañia rua ne’ebé konstrui projetu refere.
Reportajen : Egidio Nono, jornalista RTTL,ep RAEOA
