Dili – Klinika Bairo Pite mantein implementa kontribuisaun husi pasiente dolar ida.
Diretor ezekutivu klinika Bairo Pite Inacio Dos Santos konfirma, sira kontinua husu kontribuisaun husi pasiente sira dolar ida hodi finansia prepagu eletricidade.
Nia klarifika, klinika Bairo Pite kontinua simu kontribuisaun husi pasiente, tanba orsamentu ne’ebé governu transfere la suficiente, atu kompleta nesesidade klinika ninian.
Ezekutivu ne’e fundamenta, klinika Bairo Pite presiza orsamentu dolar amerikanu rihun atus rua lima nulu, atu simu pasiente nebe baixa.
Entretantu orsamentu ne’ebé governu liu husi ministériu saúde transfere ba klinika Bairo Pite dolar amerikanu rihun nen nulu resin ualu.
Tuir nia, husi transferensia fundu ne’e labele kobre nesesidade hotu iha klinika.
Nune’e, klinika Bairo-Pite desidi suspende atividade internamentu, liu-liu ba baixa no partu, baixa ba ma-nutrisaun no servisu sosial saúde feto.
(Bitu/Tomas/Siso)
