Dili – Eleisaun parlamentár sei realiza iha fulan maio, tinan ne’e.
Xefe estadu Jose Ramos Horta, konvoka reuniaun ho partidu polítiku UDT, frenti-mudança no PUDD, neebe hetan asentu iha parlamentu nasional, kona-ba realizasaun eleisaun parlamentar.
Prezidente partidu UDT, Francisco David konfirma, durante reuniaun, xefe estadu fo previzaun ba sira katak, eleisaun sei realiza iha loron sanulu resin rua, fulan maio, tinan ne’e.
Prezidente partidu frenti-mudança, Ricardo Nheu informa, frenti-mudança preparadu, atu hasoru eleisaun parlamentár.
Sorin seluk, prezidente partidu pudd Silvestre Sufa afirma, PUDD iha ona preparasaun hodi partisipa iha eleisaun parlamentar.
Alem de partidu politiku tolu ne’e, prezidente republika mos sei kontinua rona hanoin husi partidu polítiku sira seluk, antes dekreta kalendariu eleisaun parlamentár.
(Manuel/Siso)
