Dili – Bancada CNRT parlamentar aseita desizaun tribunal distrital Dili hodi liberta suspeito LM, tamba PCIK nia buska no detensaun la tuir norma legal.
Deputada Carmelita Moniz informa, tribunal nudar orgaun judisial ida nebe independente, tamba ne’e ema hotu tenke kumpre nia desizaun hodi liberta sidadaun LM.
Deputada ne’e argumenta, tuir lolos PCIK hein mandadu buska husi juis molok hodi ezekuta.
Membro komisaun lei no justisa ne’e fundamenta, PCIK labele halo buska no aprensaun ba sasan kontra bandu, tamba lei la autoriza bainhira uma nain laiha prejensa.
Vice presidente parlamentu nasional Luis Robertu Da Silva argumenta, tribunal liberta sidadaun LM, tamba konsidera PCIK nia dentensaun ilegal la tuir lei nebe vigora iha Timor Leste.
Maske nune’e membro parlamentu nasional nafatin dezafia orgaun judisiario sira atu prosesa kazu nebe sidadaun LM komete, tamba lei la autoriza sidadaun babain rai armas sensitivo iha nia rejidensia.
(Alau/Siso)
