Magazine RádiuNotisiasTetum

Amu Pároku Venilale ‘Manipula’ Kustu Renova Sertidaun, Dioseze Baucau Husu Deskulpa

RTTL-Baucau : Iha semana kotuk, sarani katólika ne’ebé trata sertidaun batizmu iha parókia Venilale dioseze Baucau sente preokupadu tanba sarani sira tenke selu $30 bainhira renova nia sertidaun batizmu ne’ebé iha fallansu.

Maibé, kustu ($30) ne’ebé amu pároku Venilale aplika ba sarani sira ne’ebé renova sertidaun, la tuir tabela ne’ebé dioseze Baucau aprova.

Tuir komunikadu imprensa ne’ebé RTTL asesu, iha Kuarta-Feira, ohin (100822), dioseze Baucau husu deskulpa ba sarani iha parókia Veninale tanba, dioseze Baucau rekoñese amu pároku Venilale nia fallansu ne’ebé aplika kustu ($30) hafoin renova sertidaun batizmu ne’e, la tuir tabela dioseze Baucau nian.

“Iha semana hirak ne’e nia laran iha media sira liliu RTTL fo sai informação konaba preço certidão iha paroquia Venilale ho custo 30 dólares (preço ne’e refere ba proceso requerimento to hetan certidão), katak preço nebe la tuir tabela administração husi Diocese Baucau” prevé iha komunikadu.

Iha komunikadu ne’e sita, hafoin RTTL publika sarani sira nia preokupasaun kona-ba kustu renova sertidaun batizmu, servisu Chacelaria bolu ona pároku no Vigário forâneo  de Baucau, padre, Manuel da Silva Ximenes, SDB, hodi konfirma kustu ($30) renova sertidaun ne’ebé aplika iha parókia Venilale.

“Los duni katak preço certidão la tuir duni tabela ne’ebé Diocese Baucau fo sai ba paroquia hotu ne’ebé pertence ba Diocese Baucau” ténik iha komunikadu.

Ho fallansu ne’ebé iha, dioseze Baucau husu deskulpa ba sarani iha parókia venilale no husu ba sarani sira atu koopera ho igreja hodi rezolve fallansu ne’ebé iha.

“Tamba ne’e, Diocese Baucau no Amu Pároco Venilale hakarak husu DESCULPA ba maluk sarani sira hotu li-liu Paroquiano Venilale ba erro nebe mak durante ne’e halo iha cartório paroquial iha Paróquia de Venilale” husu perdaun, liu husi komunikadu.

“Iha biban ida ne’e mos, hakarak hato’o ba maluk sarani sira hotu nebe pertence ba porção Diocese Baucau nian atu cria sentido de pertencia ba lgreja katak lgreja ne’e Jesus Cristo nian no ita hotu hola parte iha lgreja (greja Sinodal) tamba ne’e karik iha problema ka falhanço ruma iha administração cartorial iha paróquia sira, husu sarani sira nia tulun atu informa no resolve ho Amu Pároco sira ou ba Amu Vigário foráneo no ba Governo central Diocese Baucau atu ita hotu buka dalan hodi resolve” ikus husi komunikadu.

Reportajen : Pedro Almeida, jornalista destakadu munisipiu Baucau (100822)

Show More

Related Articles

Back to top button
error: !