Dili – Taur Matan Ruak ezonera ona sekretáriu estadu ba asuntus kombatentes libertasaun nasionál, Gil Da Costa Monteiro ‘Oan Soru‘.
Tuir fontes krediviel husi gabinete, sekretáriu estadu ba asuntus kombatentes libertasaun nasionál katak, primeiru ministru haruka karta ezonerasaun ba, Gil Da Costa Monteiru Oan Soru, iha sesta-feira lorokraik.
Bainhira jornalista RTTL husu fontes iha gabinete laran, konaba Gil Da Costa nia ezonerasaun, fontes iha gabinete ne’e responde deit, sim, sekretariu estadu hetan ona ezonerasaun husi Primeiru Ministru.
Fontes ne’ebe la temi nia naran ne’e esplika, durante ne’e governante la tam servisu tanba goja hela nia lisensa.
Tuir observasaun husi jornalista RTTL, sekretariu estadu ba asuntus kombatentes libertasaun nasionál, akompaña kandidatu prezidente númeru sorteiu 16, Jose Ramos Horta, hodi hala’o kampaña no kritika rasik nia xefe governu Taur Matan Ruak.
To’o notisia ne’e publika, RTTL seidauk halo konfirmasaun ba sekretariu estadu ba asuntus kombatentes libertasaun nasionál, Gil Da Costa Monteiru Oan-Soru tanba sei hala’o kamapaña.
(Redasaun)
