Dili – Ministeriu publiku ho banku sentral Timor-Leste devolve hikas osan rihun atus ida tolu-nulu, ne’ebe polísia prende iha aeroportu internasional Nicolao Lobato ba osan nain.
Advogadu privadu, Ismael Asunção Lopez hateten, ministeriu públiku hatun despaixu ba banku sentral hodi devolve hikas osan refere ba osan nain, tamba evidensia la priense ba krime brankeamentu kapital, finansiamentu terorismu no trafiku humanu.
Maibé, osan nain iha dever selu multa ba baku sentral tamba halo exportasaun no importasaun ba osan laiha koinesimentu husi banku sentral.
Osan refere banku sentral devolve ba osan nain iha loron 18 fulan janeiru iha tuku tolu lorokraik ho montante kompletu.
Enquantu, osan ho momtante rihun atus ida, tolunulu ne’e servisu nasional intelijensia identifika bainhira suspeitu ida ne’ebe nudar militante partidu khunto ho inisial NV tenta lori sai husi teritoriu nasional ba indonesia hodi sosa atributu partidu nian ba kampaina eleisaun parlamentar.
Entretantu bazeia ba lei númeru 5/2013 koalia kona-ba prevensaun kombate brankeamentu kapital no finansiamentu terorizmu, iha artigu 7 husi lei ne’e hatur, obrigasaun hodi deklara transporte moeda ka títulu sira ba portadór negosiavel.
Bainhira sidadaun ida tama ou sai husi teritoriu Timor-Leste lori osan ka titulu ba portador negosiavel ho montante hanesan ka superior ba dolar amerikanu rihun sanulu tenke deklara montante osan ne’ebé lori ba autoridade alfandega.
(Juvenal/Siso)
