Dili – Arguidu José Maria Dos Reis konsidera akuzasaun ministeriu publiku ligadu ho kazu fraude fiskal ne’e lalos.
Kazu fraude fiskál ne’ebé deskonfia envolve husi atuál visé primeiru ministru no ministru ordenamentu teritóriu José Maria Dos Reis nu’udar arguidu, visé prezidente CCITL João Batista Fernandes alves inklui emprezáriu Timoroan Bartolomeo Siqueira.
Julgamentu ne’e, akompaina direita husi eis primeiro ministro Mari Bin Amude Alkatiri iha tribunal distrital Dili.
Durante julgamentu, arguidu José Maria Dos Reis deklara katak, faktus neebé sita iha akuzasaun husi ministériu públiku la loos hotu, tamba iha tinan 2001 arguidu foin konversa ho arguidu João Batista Fernandes Alves kona-ba atu harii kompañia maibé arguidu ignora totalmente.
Arguidu José Maria Dos Reis husu ba tribunal atu buka tuir ema inrresponsabilidade ne’ebé mak halo estadu sofre prejuizu ho montante osan hamutuk dolar amerikanu milaun ida resin.
Tribunal distrital Dili, deside adia julgamentu ne’e ba iha loron 6 fulan dezembru tinan ne’e, hodi kontinua rona tan deklarasaun husi sasin nain rua.
Antes ne’e, arguidu João Batista Fernandes nega faktus ne’ebé ministériu púliku aprezenta kona-bá kazu fraude fiskál ne’ebé deskonfia involve ministru José Reis.
Tamba, faktus ne’ebé konsta iha akuzasaun husi ministériu publiku nian ne’e la los, tanba arguidu na’in tolu foin mak tuur hamutuk fó ideia ba malu atu hari’i empreza ho naran sunshine petrol group.
Nia deklara, kompañia refere sira seidauk lori ba rejistu iha serve hodi hetan estatutu no seidauk iha konta bankária no kontratu ho governu hodi fornese kombustível ba EDTL.
Tamba ne’e, arguidu João Batista hateten, nia parte laiha koñesimentu kona-bá kompañia la selu impostu no nunka simu notifikasaun ruma husi autoridade tributária kona-ba seidauk halo pagamentu.
Ministériu públiku akuza arguidu na’in tolu ho krime fraude fiskál ne’ebé previstu iha artigu 314, tanba deskonfia la selu taxa ba estadu ho montante dolar amerikanu millaun ida resin.
Audénsia ne’e, prezidehusi juíz koletivu José Gonçalves, Argentino Nunes no Álvaro Maria, ministériu públiku reprezenta husi prokuradora Lidia Soares no arguidu sira hetan asisténsia legál husi advogadu privadu José Guterres no Arlindo Sances.
(Juvenal/Siso)
