Dili – Ema ida kanek no kareta ida rahun, iha konfrontu husi grupu deskoiñesidu, iha Balide, fim de semana.
Grupu deskoñesidu utuliza motirizada husi diresaun sumaféro Balide ba diresaun Matadoru, iha sábadu madrugada, hodi tuda joven ida, sofre kanek “grave” iha parte ulun no oin.
Suspeitu hirak ne’e utiliza motorizada laiha xapa matríkula, hodi para besik iha festa kazamentu ida ne’ebé lokaliza iha Balide.
Vítima mane ne’e hakat sai husi aredór festa nian hodi koalia telefone iha liur, derepente grupu deskoñesidu tuda kedas vítima nia ulun.
Portavoz PNTL, superintendente xefe Arnaldo De Araújo konfirma, kazu ne’e komandu polisia munisipiu Dili halo ona investigasaun no prosesa ona ba ministeriu publiku hodi buka suspeitu.
Entretantu, hafoin tuda tiha joven ne’e, grupu dekoñesidu ne’e halai ses kedas husi fatin akontesementu no to’o agora polisia seidauk identifika.
Hafoin akontesimentu, vítima evakua kedas ba iha ospitál nasionál guido valadares hodi halo tratamentu intensive.
Alende ne’e iha grupu joven balun mós la satisfeitu ho vítima nia kondisaun no hamosu konfrontu hodi rezulta transporte ne’ebé para iha fatin refere mós hetan estragus.
(Juvenal/Siso)
