Dili – Isac Sinarai Da Costa tinan 20 mate hafoin hetan oho husi suspeitu deskoinesidu nain rua, iha area delta elemloi, sexta feira madrugada semana ne’e.
Matebian nia aman, Sinarai Da Costa hateten, matebian sai husi uma iha oras tuku sia kalan, atu ba hemu tua iha vizinu ida nia uma iha área São José nian.
Hafoin ne’e, mosu dezentedimentu balun entre vitima ho nia kolega sira iha fatin refere, tamba ne’e matebian deside fila atu ba nia avo iha área Fatuhada, maibe derepente iha oras tuku rua madrugada hetan oho hosi ema deskoñesidu iha área Elemloi.
Familia matebian ezize ba polisia atu kaptura lalais suspeitu sira, hodi responsabiliza ba aktu krime ne’ebe komete.
Komandante polisia munisipiu Dili, superintendente xefe Natercia Eufrazia Martins hateten, hafoin simu informasaun, ekipa polisial to’o kedas fatin akontesimento hodi halo ezaminasaun.
Nia argumenta, polisia mos rekoilla ona gravasaun husi kamera vizilansia CCTV iha loja balun, hodi reforsa investigasaun no buka tuir suspeitu.
Dadaun ne’e, joven nain lima ne’ebe sira hemu tua hamutuk submete ona ba prosesu identifikasaun.
Enquantu, ekipa forensik PNTL ho departamentu investigasaun kriminal nasional dada ona liña polisia no halo ezaminsaun ba fatin akontesimentu hafoin prosesa ba ministeriu publiku.
(Juvenal/Siso)
