Dili – Komandu polisia munisipiu Dili prende motorizada 34 ho kareta ida husi adeptus Portugal ne’ebe halo konvoiu iha kapital Dili.
Portavoz komandu jeral PNTL, superintendente xefe Arnaldo De Araujo liu husi konferensia imprensa hateten, motorizadas hirak ne’e, kompostu husi motorizadas kanu resin 9, la uza kapasete 5, laiha asesores 20 no kareta ida laiha dokumentus.
Hafoin prende polisia tranzitu munisipiu Dili lori kedas transporte hirak ne’e ba komandu Dili hodi aplika infrasaun selu iha banku hafoin foti fila sira nia transporte.
Diretor ezekutivu fundasaun mahein, Abel Amaral hateten, polisia uja nia kompetensia hodi atua adeptus sira ne’ebe halao konvoiu iha kapital Dili, nebe viola regras tranzitu no lei kodigu estrada.
Operasaun ne’e, komandu PNTL munisipiu Dili sei halao ho máximu iha tempu kalan no loron hodi atua no prende transporte ne’ebe viola lei tranzitu no lei kodigu estrada.
Enquantu, tersa feira madrugada ne’e, adeptus husi nasaun Portugal halao komvoiu no baruillu ho motorizadas kanu resin haleu kapital Dili hodi halo komunidade balun labele deskansa ho diak.
(Juvenal/Siso)
