Dili – Parlamentu nasional elimina ona fundu veteranu kombatente libertasaun nasional liu husi votasaun, iha final global, hafoin tribunal rekursu konsidera inkonstitusionalidade.
Desizaun ne’e, uma fukun parlamentu nasional foti liu husi diskusaun iha jeneralidade no especialidade, hodi reformula dekretu parlamentu nasional kona-ba orsamentu jeral estadu tinan 2023, ba fundu veteranu ho montante biliaun ida.
Prezidente parlamentu nasional Aniceto Guterres informa, ho akordaun tribunal rekursu ne’ebe konsidera fundu veteranu inkonstitusional, tanba ne’e mak parlamentu nasional halo reformulasaun ba dekretu parlamentu kona-ba orsamentu jeral estadu tinan 2023.
Ministru finansa Rui Gomes informa, governu la konkorda ho desizaun tribunal rekursu, maibe respeita desizaun hodi elimina fundu veteranu ho montante biliaun ida husi orsamentu jeral estadu.
Entretantu órgaun lejislativa halo reformulasaun ba dekretu parlamentu ba orsamentu jeral estadu 2023, ne’e aprova iha jeneralidade ho votus a favor 41 kontra 1 no abstensaun 18.
Enkuantu, votasaun, iha final global pasa ho votus a favor 40 kontra 0 no abstensaun 20.
(Bitu/Alau/Siso)
