Dili – Deputado Mariano Asanami husu politku sira atu labele interpreta konstituisaun RDTL tuir nia hakarak.
Membro asembleia konstituente ne’e hateten, ema hotu bele interpreta lei hodi hadia, maibe konstituisaun mos iha ona mekanismo rasik atu bele halo revizaun.
Tamba ne’e, deputado Mariano Asanami afirma, bainhira ema hotu halo intepreta tuir sira nia hakarak, sei lori nasaun Timor Leste hasoru difikuldade ho implementasaun lei inan iha Timor Leste.
Asanami lembra katak, iha tinan 20 ba kotuk membro asembleia sira ho esforsu tomak buka referensia hodi halo diskusaun kada artigo ho tempo naruk atu konstituisaun ne’e bele dinamika refleta ba kondisaun timor leste nian.
Membro asembleia konstituente actual deputada bankada FRETILIN Jozefa Alvares Pereira, agradese ba membro asembleia tomak ne’ebe konsegue produs ona lei inan to’o ohin loron Timor Leste uja hanesan mata dalan estado Timor Leste nian.
Elaborasaun konstituisaun RDTL ho durasaun fulan ne’en husi membro asembleia konstituente hamutuk ualu nulu mai husi partido politku 12 hodi produs konstituisaun RDTL total artigo hamutuk 170.
(Alau/Siso)
