Dili – Komandu jeral PNTL relata, Timoroan rihun lima resin maka tama ona ba buka servisu iha nasaun Portugal.
Komandante jeral PNTL, komisariu Faustino Da Costa hateten, durante fulan tolu ikus ne’e, Timoroan liu rihun lima, maka sai ba buka servisu no balun sai vitima hodi toba deit iha jardim.
Embaixada Timor-Leste iha Portugal ho governu Portugal kontinua esforsu makas hodi resolve problema ne’ebe Timoroan sira enfrenta iha Portugal.
Komisariu polisia ne’e argumenta, embaixada ho governu Portugal hahu identifika emprezariu sira iha Portugal hodi haruka Timoroan sira ba servisu.
Foin lalais ne’e, Timor-Oan hamutuk na’in hitu, kompostu husi mane na’in neen ho feto ida fila ona mai Timor-Leste tamba durante tempu barak abandona iha nasaun Portugal, ne’ebé fasilita husi ajénsia New Generation.
Dadaun ne’e, prezidensia repúblika liu husi kaza militár, hala’o reuniaun ho autoridade seguransa, hodi kria ekipa buka tuir ajénsia ne’ebé haruka Timor-Oan ba servisu iha diáspora la liu husi dalan legál.
(Juvenal/Siso)
