Dili – Komisaun anti korupsaun kontinua halo buska no aprensaun domisiliariu ba membru ministru assuntus parlamentares no komunikasaun social, iha nia servisu fatin no residensia iha Likisa .
Segunda-feira ohin, tuku ualu ho balun, ekipa komisaun anti korrupasaun, halo buska no aprensaun ba ministru assuntus parlamentares no komunikasaun social, Francisco Jerónimo, ligadu ho kazu Set-Top Box RTTL.EP.
Ekipa prende komputador Mac ida ho dokumentus importante balun ligadu ho kazu Set-Top Box RTTL.EP.
Ekipa mos halo buska ba kareta estadu ho xapa matrikula 006g ne’ebe governante ne’e utiliza ba servisu.
Hafoin ekipa kontinua kedas ba edifisiu Federasaun Football Timor-Leste hodi prende tan evidensia no dokumentus balun hafoin kontinua buska domisiliariu ba residensia governante nian iha Munisipiu Likisa.
Prosesu buska no aprensaun domisiliariu ne’e, akompaina direita husi nia advogadu privadu Arlindo Sanches ho nia asesor legal sira.
Ekipa konjunta ne’e, kompostu husu servisu investigasaun kriminal nasional no komisaun anti korupsaun-KAK.
Antes ne’e, ekipa konjunta komisaun anti korupsaun kaptura ona arguidu nain rua inisial GPSD ho MFC hodi detein durante oras 72 hafoin submete ba primeiru interrogatoriu iha tribunal distrital Dili.
Tamba ne’e, desizaun tribunal distrital Dili aplika medidas apresentasaun periodika no proibisaun ajensia ba arguidu nain rua.
(Juvenal/Siso)
