Dili – Ospital nasional Guido Valadares rejista ona pasientes atus haat neen nulu ne’ebe ba halo radiolojia iha tinan ne’e.
Diretor ezekutivu Alito Soares, hatoo asuntu ne’e hafoin partisipa iha komemorasaun loron mundial radiolojia ba dala atus ida rua nulu resin hitu, iha salaun hospital nasional Guido Valadares, tersa feira ohin.
Alito Soares hateten, durante ne’e hetan apoiu máximu husi doador sira hodi servisu hamutuk halo atendementu ba pasientes ne’ebe sofre moras.
Iha sorin seluk, xefe departamentu radiolojia, Albertu Dos Santus informa, hospital nasional esforsu hodi asegura ba diagnostiku radiolojia, tamba ne’e presiza aumenta rekursus hodi responde ba nesesidades pasientes.
Iha ambitu komemorasaun ne’e, realiza mos seminariu ida ho topiku fahe informasaun konaba efeitu negativu husi utilizasaun radiolojia ba apoiu diagnostiku.
(Ancha/Siso)
