RTTL,EP : Udan boot ne’ebé akontese iha segunda-feira loraik (21/02/22) provoka inundasaun iha kapitál Dili hodi estraga sidadaun balun nia uma ne’ebé harii iha mota ninin Comoro no Beduku inklui fatin seluk hanesan Becora no Hera.
Tuir dadus ofisiál provizóriu husi Sekretáriu Estadu Protesaun Sivíl, uma kain 54, ne’ebé hetan estragus, oras ne’e família evakua ona ba sentru akollamentu iha Dom Bosco no balun seluk hela iha viziñu nia hela fatin.
Maske uma barak hetan estragus maibé, Sekretáriu Estadu Protesaun Sivíl, Joaquim Gusmão, hatete, governu la “apoia material konstrusaun ba vítima dezastre” tanba kontinua hela iha fatin risku ba dezastre ne’ebé governu bandu.
Protesaun sivíl apoia de’it nesesidade bázika vítima dezastre naturais iha sentru akollamentu no vítima sira iha munisipiu.
“Protesaun sivíl mós fó ona asisténsia ba família afetadu inundasaun uma kain 12 iha munisípiu Manatuto no afetadu sira ne’ebé hela temporáriu ho família viziñu” Joaquim Gusmão, klarifika.
Antes ne’e, governu alerta ona ba sidadaun hotu iha kapitál dili atu labele harii uma iha mota ninin ne’ebé identifikadu hanesan risku ba dezastre naturais.
Maibé realidade hatudu, sidadaun kontinua konstrui uma iha mota ibun tanba deit razaun la iha rai atu harii uma.
Reportajen : Juvenal da Silva (220222)
