Dili : Iha ona esperiénsia kona ba konfinamentu obrigatóriu iha fulan Marsu no Abríl, iha tempu ne’ebá governu hapara movimentu transporte públiku hanesan taxi no mikrolete inklui karreta husi munisípiu ba kapitál Dili.
Hafoin rona konsellu ministru nia desizaun kona-ba konfinamentu domixiliariu iha loron kuarta-feira (250821), motorista sira husi transporte públiku konsidera hanesan lakon esperansa, no balun hahú preokupa ona kona-ba osan ne’ebé atu selu uma arrendamentu (uma kos) balun seluk hanoin kona-ba ai-han hodi responde ba oan sira kabun.
Taksista, Antonio Soares, sente triste ho desizaun governu nian tanba lori tan susar ba sira ne’ebé nia moris ‘sadere’ de’it ba karreta.
“Governu taka (konfinamentu domixiliáriu) ami sei susar, seidauk konfinamentu mós ami hetan osan ne’e susar ona sá tan ema labele la’o sai, ne’e sei susar liu; uluk ha’u ba vasina tanba hakarak halai karreta maibé agora vasina kompletu mós labele la’o sai” Antonio Soares preokupa.
Motorista mikrolete ‘01’ Raimundo da Silva, relata, nesesidade uma laran depende de’it ba mikrolete nia operasaun maibé “aplikasaun konfinamentu obrigatóriu sei haterus ami motorista sira”.
Rekorda katak, kuarta feira ne’e (250821) governu deside ona serka sanitaria no komfinamentu obrigatóriu ne’ebé entra em vigor iha loron 27 fulan agustu to’o loron 2 fulan Setembru.
Reportajen : Manuel Gusmão (260821)
