Dili – Governu aprova ona planu estratéjiku nasionál ba dezenvolvimentu turizmu tinan 2023 too 2030.
Projetu rezolusaun governu ne’e, aprezenta husi ministru turizmu komérsiu no indústria, José Lucas Do Carmo Da Silva ne’ebé hetan aprovasaun iha reuniaun konselu ministru iha kuarta-feira ohin.
Ministru presidencia konselu ministru, Fidelis Leite Magalaens haktuir, planu estratéjiku ida-ne’e ho ninia objetivu atu dezenvolve Timor-Leste iha seitor turizmu.
Governu sei servisu hamutuk ho parseria ho interveniente hotu-hotu, ne’ebé instituisaun nasionál, sosiedade sivíl, parseiru sira dezenvolvimentu no setór privadu, hodi dezenvolve setor turizmu.
Iha parte seluk, governu aprova projetu dekretu-lei atu prolonga tan períodu distribuisaun sesta bázika.
Ho aprovasaun ba diploma ida-ne’e, prazu distribuisaun sesta bázika, ne’ebé molok ne’e define ona to’o loron 31 fulan-dezembru tinan 2022, sei hanaruk tan to’o loron 30 fulan-maiu tinan 2023.
(Domingos/Siso)
