Dili – Fundasaun mahein ezize komandu jeral PNTL atu loke prosesu investigasaun kriminal hasoru membru polisia nain ualu ne’ebe deskonfia envolve, ba kazu tara aan iha sela detensaun.
Diretor interinu fundasaun mahein, Abel Amaral hateten, desizaun komandu hodi suspende ba membru nain ualu ne’e tenke iha kontinuasaun.
Komandu jeral PNTL forma ona ekipa konjunta ida, kompostu husi PDHJ, ministeriu publiku, defensor publiku no familia matebian sira hodi halo investigasaun ba kazu José Bernardo nia mate iha resintu sela komandu Dili.
Antes ne’e, komandu jeral PNTL hasai ona despaisu ida hodi halo suspensaun preventiva ba membru polisia nain ualu, kompostu husi inspektur nain tolu ho inisial AS, MS, AQ, sarjento xefe LS, ajente xefe TV, fada no ajente prinsipal nain rua TDCP ho AAM.
(Juvenal/Siso)
