Dili – Bankada governu, KHUNTO no FRETILIN la konkorda governu implementa subsidiu dolar atus rua ho kategoria universal.
Bankada khunto no FRETILIN husu ba governu, atu esklui funsionariu publiku no sidadaun sira ne’ebe simu salariu dolar atus lima resin, husi subsidiu uma kain iha fulan novembru no dezembro.
Xefe bankada KHUNTO, Olinda Guterres deklara, bancada KHUNTO la konkorda governu implementa subsidiu dolar atus rua ba sidadaun hotu, tamba parlamentu nasional aprova subsidiu refere ba deit sidadaun neebe nia rendimentu menus husi dolar atus lima.
Xefe bankada FRETILIN David Dias Ximenes, sujere ba governu implementa subsidiu dolar atus rua, ba deit família vulneravel sira no sidadaun ne’ebé ho salariu menus husi dolar atus lima.
Entretantu, projetu dekretu lei kona-ba apoiu subsidiu dolar atus rua ba uma kain sira iha fim do ano ne’e, aprezenta husi vise primeira ministra no ministra solidariedade sosial no inkluzaun Armanda Berta Dos Santos, no hetan ona aprovasaun iha reuniaun konsellu ministru.
(Bitu/Alau)
