Dili – Fundasaun mahein avalia, kriasaun lei organizasaun investigasaun kriminal la solusiona polémika no rivalidade entre PNTL no polisia sientífika investigasaun kriminal (PSIK).
Diretor ezekutivu interinu fundasaun mahein Abel Amaral argumenta, lei investigasuan criminal, sei desmotiva dezenvolvimentu instituisaun PNTL, tanba fó kompetensia boot liu ba PSIK, hodi hasai kompetensia sira ne’ebe durante ne’e ezerse husi pntl iha materia investigasaun criminal.
Abel Amaral analiza, ejistensia lei organizasaun investigasaun la mellora servisu PNTL nian, maibé sei hafraku servisu instituisaun pntl ne’ebe eziste ona tinan rua nulu.
Iha parte seluk, xefe operasaun servisu investigasaun kriminal no tekniku senior forensik PNTL, inspetor xefe Mouzinho Correia informa, maske lei organizasaun investigasaun kriminal ne’e aprovadu ona, maibé servisu investigasaun kriminal kontinua simu kazu krime sira.
Entretantu iha loron sanulu resin hat, fulan juñu tina ne’e parlamentu nasional aprova lei organizasaun investigasaun kriminal no prezidente republika promulga iha loron ualu fulan jullu ne’e.
Enkuantu tuir lejislador sira katak, lei ne’e importante, hodi regula organizasaun no funsionamentu investigasaun kriminal iha ámbitu lei prosesual penal no define mós órgaun sira polisia kriminal iha kompetensia jenérika ka espesializada.
(Bitu/Alau)
