Dili – Fámilia matebian ezize ba komandu PNTL atu kaptura suspeitu sira, ne’ebe oho matebian Izac Sinarai Da Costa, iha delta Elemloi, iha semana kotuk.
Aman husi matebian, Florentino Ximenes Da Costa Sinarai hateten, nia oan mate, loron neen ona maibe to’o agora polisia seidauk kaptura suspeitu sira.
Tanba ne’e, mutivu husi kazu omisidiu ne’e seidauk hatene lolos.
Xefe aldeia São José Aimutin, José Muca Sana deklara, polisia rekolla hotu ona evidensia ho gravasaun husi kamera vizilansia CCTV, maibe to’o agora polisia seidauk kaptura suspeitu.
Portavoz komandu jeral PNTL superintendente xefe, Arnaldo De Araujo, husu familia matebian atu fo tempu ba polisia hodi halao servisu no ekipa konjunta kontinua buka tuir suspeitu nia paradeiru.
Antes ne’e, departamentu investigasaun kriminal nasional rekolla ona evidensia husi gravasaun kamera CCTV balun, hodi reforsa investigasaun.
Iha parte seluk, ema nain ualu hodi submete ba prosesu identifikasaun, hodi hatene lolos motivu husi akontesimentu ne’e.
(Juvenal/Siso)
