Dili – Departamentu investigasaun kriminal munisipiu Dili kontinua halo identifikasaun ba suspeitu ho inisial ODX ne’ebe deskonfia sona vitima Damazio Guterres, iha ponte Bj habibi, foin lalais.
Portavoz komandu jeral PNTL, superintendente xefe, Arnaldo De Araújo liu husi konferensia imprensa quarta-feira ne’e hateten, iha prosesu identifikasaun maka suspeito komete duni, sei detein durante oras 72 hafoin apresenta ba primeiru interogatoriu iha tribunal.
Maibé, portavoz PNTL ne’e seidauk relata lolos motivu husi akontesimentu ne’e, tamba sei iha prosesu identifikasaun.
Ekipa konjunta ho komandu PNTL munisípiu Manufahi, asegura suspeito iha área Fatuberliu, munisípiu Manufahi, bazeia ba informasaun ne’ebé hato’o husi servisu sekreta sira.
Hafoin kaptura, ekipa konjunta lori kedas suspeitu mai Díli hodi submete ba prosesu identifikasaun.
Entertantu vítima, Damancio Guterres sei kontinua hela tratamentu intensivu iha ospitál nasionál Guido Valadares Dili.
(Juvenal/Siso)
