Dili – Bankada FRETILIN lamenta ho deklarasaun xefe estado, Jose Ramos Horta ne’ebe kestiona servisu orgaun lejislativo ba produs lei responsabilidade Presidente Republika.
Iha deklarasaun politika, vice xefe bankada FRETILIN deputado, Antoninho Bianco hateten, deklarasaun xefe estado Jose Ramos Horta ne’e hatun dignidade orgaun soberano parlamentu nasional iha media internasional Al-Zazeera.
Deputado Antoninho Bianco argumenta, iha sistema semi presidensialista, orgaun soberano seluk labele halo intervensaun ba orgaun seluk nia kna’ar.
Deputado bankada KHUNTO Luis Robertu Da Silva afirma, xefe estado tuir lolos garante estabilidade ba orgaun soberano sira.
Deputada bankada PLP Maria Anjelina Sarmentu husu Presidente Republika atu respeita separasaun de poderes entre orgaun soberano sira.
Maibe deputado bankada CNRT Jose Virgilio questiona bankada plataforma sira nia desizaun ba aprovasaun lei hodi kontrola orgaun soberano seluk.
Foin lalais ne’e parlamentu nasional liu husi bankada governu inisia projetu lei responsabilidade hodi diskuti no aprova, hafoin ne’e kontinua envia kedas ba xefe estado francisco guterres, maibe la konsegue promulga iha mandatu ikus.
(Alau/Siso)
