Dili – Prezidente Repúblika promulga dekretu lei subsídiu kombustivel.
Komunkadu imprensa ne’ebe RTTL asesu husi gabinete palacio prezidente sita katak, dekretu lei subsidiu kombustivel atu atribui ba operadores transportes rodaviariu públiku, Aéros, marítimu nasionais no adkirentes kombustivel ba atividade agrikola no peskas.
Prezidente republika promulga dekretu lei refere, tanba submete husi governu iha loron 13 fulan abril tinan 2022.
Iha dekretu lei ne’e hateten katak, situasaun akontese iha Ukrania provoka aumentu substansial folin baril petroleum, folin kombustível sa’e makaas ba konsumidores prejudika dezenvolvimentu atividade ekonómika país nian.
Dekretu ne’e estabelese subsídiu finanseiru, ho natureza esesional no tranzitória ho objetivu hamenus impaktu ekonómiku husi folin kombustivel ne’ebé sa’e, atribui ba operadores transportes públikus no ba adkirentes kombustíve destinadu ba atividades agríkola no piskatória.
Subsídiu sei atribui liu husi voucher kombustível, ho montante korrespondente ho porsentu atus ida husi valor diferensa entre folin médiu husi kombustível iha dezembru 2021 no folin kombustivel ne’ebé aplika iha data emisaun voucher kombustível husi dolar ida too folar ida, sentavu rua nulu resin lima.
(Manuel/Siso)
