Magazine RádiuNotisiasTetum

Udan No Anin Boot Lori Susar Ba Família 99

RTTL,EP : Iha loron segunda-feira 210222. Kalohan metan falun metin loron matan. Loron matan nia roman namlaik, la konsege leno borus kalohan metan.

Foho Fatu-ahi parte lorosa’e no foho Balibar iha parte rai-klaran, nia tutun falun metin ho abuabu. Udan been mós turuk husi kalohan la para.

Lori oras balun, udan suviska nakfila sai udan boot. Bee sulin husi Bee-tuda Fatisi kahur ho mota Comoro, nakfila sai tasi hodi sobu komunidade nia uma.

“Aiii…Na’i, ha’u nia uma mota lori ona…aiii…Na’i tulun ha’u ba” inan feton ida tanis bainhira mota lori nia uma.
Uma na’in hare rasik ho matan, mota sobu neineik fundasaun uma iha mota ninin. Ikus mai, nia uma mutin ne’e monu ba mota laran, Bee lori ba tasi.

Sorin seluk, sira be harii uma iha mota Comoro ninin, Bee tama uma, lori nia roupa no dokumentus importante balun.

Uma na’in lori nia roupa restu tula ba karreta, lori ba fatin seguru. Balun ba hela ho família no balun seluk ba hela iha sentru akollamentu Dom Bosco Comoro.

Tuir dadus husi Sekretária Estadu Protesaun sivíl, Joaquim Gusmão, konfirma, ekipa téknika rejista xefe fámilia, sia-nolu resin-sia (99), sai vítima ba dezastres naturais.

“Fámilia afetadu iha Dili, 80 evakua ona ba sentru akollamentu Don Bosco Comoro. Iha RAEOA família 20 mak hetan dezastre no iha munisípiu Manatuto família 12 mak afetadu ba inundasaun”, nia relata.

Sekretaria estado protesaun sivil mos kontaktu ho ministerio saude hodi loke “postu saúde ki’ik ida iha sentru Don Bosco Comoro” hodi fó tratamentu saúde ba vítima sira ne’ebé sofre moras.

Protesaun Sivíl ho Kruz Vermelha Timor-Leste fó ona apoiu emerjénsia hanesan Susu-Ben, Ai-han tasak, Biti no Manta ba vítima sira ne’ebe hela iha sentru akoillamentu Don Bosco Comoro.

Sorin seluk, Protesaun Sivíl, alerta ba sidadaun ne’ebé hela iha mota ibun no foho lolon, tenke kuidadu tanba posibilidade sei akontese udan bo’ot iha territóriu Timor-Leste.

“Sidadaun tenke atensaun, tanba tuir previzaun meteorolójiku, sei akontese udan no anin iha Timor-Leste” nia alerta.

Tuir previzaun meteorolójiku, hahú loron 22 to’o 27 fulan Fevereiru tinan ne’e, akontese udan moderadu ba forte iha munisípiu Aileu, Baucau, Bobonaro, Liquiçá, Lautem, Manatuto, Manufahi no Díli .

Reportajen : Juvenal da Silva (230222)

Show More

Related Articles

Leave a Reply

Your email address will not be published.

Back to top button