Magazine RádiuNotisiasTetum

PN Husu Investiga Kazu Lori Osan Ba Aeroportu


Dili – Parlamentu nasional husu autoridade polisia halo investigasaun klean ba kazu sidadaun lori osan dolar amerikanu rihun 130 no rupiah millaun 40 resin tama aeroportu Nicolau Lobato.

Deputadu bankada FRETILIN Joaquim Dos Santos hateten, presiza halo investigasaun hodi hatene razaun sidadaun ho inisiál SMG, CFBB no MRSVB lori osan dolar amerikanu rihun 130 no rupiah millaun 40 resin ne’e.

Joaquim afirma, tuir regra bainhira lori osan cash liu rihun sanulu ba leten tenke hetan deklarasaun husi banku, bainhira laiha deklarasaun autoridade relevante iha kompetensia hodi halo kapturasaun.

Vise ministru justisa, José Edmundo Caetano konfirma, osan refere husi partidu KHUNTO ho destinasaun ba indonezia hodi selu atributu sira ba kampaña parlamentár tinan oin.

Iha fatin hanesan prezidente tribunal rekursu, Deolindo Dos Santos hateten, tribunal seidauk bele deklara pozisaun ruma, tanba kazu refere sei iha prosesu investigasaun.

Entretantu; bazeia ba lei numeru 5/2013 koalia kona-ba prevensaun kombate brankeamentu kapital no finansiamentu terorizmu, iha artigu 7 husi lei ne’e hatur obrigasaun hodi deklara transporte moeda ka títulu sira ba portadór negosiavel.

Bainhira sidadaun ida tama no sai husi teritoriu Timor-Leste lori osan ka titulu ba portador negosiavel ho montante hanesan ka superior ba dolar amerikanu rihun sanulu, tenke deklara montante osan ne’ebé lori ba autoridade alfandega.

(Bitu/Alau)

Show More

Related Articles

Leave a Reply

Your email address will not be published. Required fields are marked *

Back to top button
error: !