Dili – Bancada CNRT parlamentar preokupa ho tabela salarial husi dirijente institutu autonomo ho orgaun soberano sira seluk.
Vice xefe bancada CNRT, Patrocinio Fernandes hateten, salario nebe atribui ba dirijente sira iha institutu autonomo sira laiha balansu ho sira nia servisu.
Tamba ne’e bancada CNRT sujere ba governu atu altera lalais dekretu lei ne’e, hodi labele hatodan despezas estado iha futuru.
Maibe ministro presidensia konselhu ministro, Fidelis Leite Magalhaes defende katak, oitavo governu adopta deit, dekretu lei sira husi governu anterior.
Maske nune’e governante ne’e deklara governo sei halo diskusaun iha konselhu ministro hodi altera dekretu lei hirak ne’e, tamba ministerio prepara ona esbosu lei ida atu apresenta iha konselhu ministro.
Tuir tabela salarial nebe espalha iha media sosial, salario husi presidenti institutu autonomo sira maioria ho salario mensal dolar rihun 6 resin, enkuanto orgaun soberanu sira nia salariu hanesan presidente republika salario mensal rihun lima, presidente parlamentu nasional no primeiro ministro nia salario mensal rihun hat atus lima dolar amerikano.
(Alau/Siso)
