Dili – Primeiru ministru konsidera, Jape Kong Su hanesan fontes inspirasaun ba Timor oan hotu ne’ebe kontribui makas ba prosesu desenvolvimentu Timor Leste.
Jape Kong Su koñesedu avó Jape no nain ba Timor plaza mate iha segunda feira semana ne’e ho idade sia nulu resin hitu iha Australia.
Familia deside mate isin Jape Kong Su sei lori mai Timor Leste iha loron nen fulan outubru nee.
Xefi governu Taur Matan Ruak hateten, Timor oan sira lakon ona fontes ba inspirasaun neebe kontribui mos iha prosesu dezenvolvimentu nasional.
Primeiru ministru Taur Matan Ruak garante, jerasaun husi avó Jape sei kontinua obra ne’ebe matebian husik hela.
Entretantu, jape group harii hosi Jape Kong Su iha Darwain-Austrália iha tinan 1976 no susesu iha projetu proprietáriu komersial iha Darwin dékada 1980.
Tanba komérsiu ne’e hetan progresu, iha tinan 1989 harii tan jape homemaker village no tinan 2011 harii Timor plaza iha Timor Leste nu’udar sentru komersial modernu.
(Domingos/Siso)
