RTTL,ep : Komandu Polísia Munisipiu Dili kontinua pasa revista iha tempu kalan hodi kontrola sidadaun ne’ebé utiliza motorizada no karreta, nune’e bele la’o tuir regra kódigu estrada, evita asidente rodoviária.
Durante pasa revista, Komandu Polísia Munisípiu Dili prende motorizada unidade 268 ho karreta 9 tanba la iha dokumentu komprovativu no asesóriu la kompletu.
Komandante Polísia Munisípiu Dili, Superintendente Xefe, Henrique da Costa, relata, polísia prende transporte hirak ne’e hodi aplika infrasaun tuir kódigu estrada.
Durante semana ida nia laran, polísia mós rekolla koima hamutuk dolar amerikanu $ 9.864 ba kofre estadu.
“Transporte hirak ne’e polísia prende tanba la iha xapa matrikula, dokumentus no asesóriu” Komandante Polísia Munisípiu Dili, Superintendente Xefe, Henrique da Costa, relata.
Superintendente Xefe, Henrique da Costa, apela ba komunidade sira iha kapitál Dili, prepara dokumentu no asesóriuu bainhira utiliza transporte, nune’e bele livre husi tránzitu.
Enkuantu, operasaun ne’e kontinua hetan apoiu husi Unidade Espesiál Polísia, Unidade Polísia Marítima, Unidade Patruillamentu Fronteira destakadu iha aeroportu internasionál Nicolao Lobato.
Reportajen : Juvenal da Silva (21022)
