Dili – Governu komprometidu, kontinua hadi’a infraestrutura iha hospital nasionál Guido Valadares.
Komprimisio ne’e hato’o husi primeiru ministru, Taur Matan Ruak hafoin inaugura ekipamentu liptotrípsia no MRI iha hospital nasionál Guido Valadares iha quarta feira ne’e.
Taur Matan Ruak agradese ba parseiru dezenvolvimentu repúblika popular Xina, ne’ebé apoiu ona hospital nasional hodi instala ekipamentu ne’e.
Xefe governu ne’e manifesta, governu sei kontinua esforsu hadi’a infraestrutura no prepara ekipamentu seluk iha hospital nasionál Guido Valadares, hodi atende públiku ho máximu.
Médiku sirurjiaun jerál hospital nasionál Guido Valadares, Raimundo Dos Santos hateten, ekipamentu foun ne’e, sei utiliza hodi tiru sai fatuk husi pasiente sofre moras rins sira nia isin, la presija ona halo operasaun.
Tuir dadus ne’ebé hospital nasionál guido valadares rejista, husi tinan 2017 to’o fulan setembru ne’e, total pasiente ne’ebé mai ho moras rins hamutuk rihun ida atus haat tolu nulu resin haat, maioria liu husi operasaun no balun transfere ba rai liur.
(Sergio/Alau)
