Dili – Banku sentral Timor-Leste dezamina informasaun konaba kombate krimi brankeamentu kapital no finansiamentu terorismu ba falintil forsa defeza Timor-Leste.
Xefe estadu maior F-FDTL, comodoro Donaciano Costa Gomes “Pedro Klamar Fuik” hateten, estadu Timor Leste, tenki iha kredibiladade hodi kontrola orsamentu sira ne’ebe sirkula iha nasaun Timor-Leste, hodi evita krimi brankeamentu kapital no finansiamentu terorismu.
Diretor ezekutivu unidade informasaun finanseiru banku sentral Timor Leste, Maria José Sarmento hateten, unidade informasaun finanseiru detekta duni aktividade ilísitu ba krimi brankeamentu kapital no krimi sira ne’e nia orijem mai husi krimi korupsaun, fraude, trafiku humanu, trafiku droga no krimi sira seluk tan.
Enquantu, unidade informasaun finanseiru estabelese liu husi lei anti brankeamentu kapital númeru 17/2011 iha banku sentral Timor Leste nia laran.
Dezaminasaun informasaun ne’e, partisipa maxímu husi komandante komponente no unidade inklui ofisiais superiores F-FDTL sira.
(Juvenal/Siso)
