Dili – Fundasaun mahein kondena makas aktu oknum polísia sientifika investigasaun kriminal ne’ebe lori pistola ameasa pesoal seguranca, iha hotel tera santa.
Diretor ezekutivu fundasau mahein, Abel Amaral hateten, tuir lolos armas ne’ebe oknum PCIC ne’e lori iha deit oras servisu no situasaun difisil ruma.
Tamba ne’e, nia husu ba governu liliu ministeriu justisa ho komisaun B parlamentu nasional, atu avalia no dezempeina servisu membru PCIC sira ne’ebe lori armas fora husi oras servisu.
Ezekutivu ne’e, husu mos ba direitor PCIC atu fo sansaun disiplinar ba membru polisia ne’ebe komete aktu krimi ne’e.
Fundasaun mahein husu ba vitima sira atu hato’o keixa ba departamentu servisu investigasaun kriminal nasional-PNTL ou ministeriu publiku hodi loke prosesu hasoru oknum PCIC ne’e.
Kazu ne’e, akontese iha loron sexta feira liuba bainhira oknum PCIC ne’e partesipa iha festa kazamentu ida iha hotel terra santa Komoro.
Relasiona ho kazu ne’e, jornalista sira tenta konfirma ho adjuntu diretor PCIC, Adino Nunes Cabral maibe lakoi fo komentariu tamba okupadu ho servisu seluk.
(Juvenal/Siso)
