Dili – Departamentu investigasaun kriminal nasional detein ona suspeitu nain hát ba kazu loke jogu toto bola illegal, iha delta kuatru Komoro.
Portavos komandu jeral PNTL, superintendente xefe Arnaldo De Araujo hateten, aktividade ilegal ne’ebe ekipa konjunta identifika nudar auto krime ne’ebe previstu iha artigu 322 kodigu penal konaba explorasaun jogu ilísito.
Nune’e, inspetor jeral jogu entrega kedas ekipamentu jogu ne’ebe prende ho autor nain hát ba departamentu investigasaun kriminal nasional hodi halo investigasaun.
Autor hirak ne’e ho inisial GLG tinan 53, husi xina, HL tinan 50 husi Xina, di tinan 48, husi Indonesia no Amaf tinan 31 Timor oan.
Autor nain hát kontinua detein, durante oras 72 hafoin apresenta ba primeiru interogatoriu iha tribunal distrital Dili.
Ekipa konjunta prende mos ekipamento hanesan, komputador 16, ekran ida, router 3, makina imrensaun 3, modem ida, kadeira 25 inklui osan rihun ida resin.
Ekipa konjunta ne’e, kompostu husi inspetor jeral jogu, departamentu investigasaun kriminal nasional, servisu informasaun polisia no servisu nasional intelijensia.
(Juvenal/Siso)
