Dili – Ekipa konjunta ezekuta mandadu prizaun hodi kaptura arguidu Domingos nacimento tanba komete kazu abuzu seksuál hasoru menor.
Hafoin kaptura arguidu Domingos Nacimento, ekipa lori kedas arguidu ba hasai sertifikasaun iha investigasaun kriminál munisípiu Díli hafoin lori ba kumpri sentensa tinan neen iha estabelesimentu prijionál Becora.
Kazu abuzu seksuál hasoru menor ne’e akontese iha tinan 2019, iha area Tasi Tolu suku Madohi.
Hafoin simu mandadu ne’e, ekipa halo kedas planu operasaun no buka tuir arguidu nia paradeiru no konsege detekta hodi kaptura iha área Rai-Kotu, suku Madohi, munisípiu Díli.
Antes ne’e, tribunál distritál Díli liuhosi leitura sentensa, fó pena prizaun tinan neen ba arguidu, nune’e parte defeza halo kedas rekursu hasoru desizaun tribunál primeira instánsia ne’e, maibé ikus mai tribunál desizaun mantein ho prizaun tinan neen.
Ekipa konjunta ne’e, kompostu husi servisu investigasaun kriminál munisípiu Díli ho servisu investigasaun kriminál nasionál no unidade ema vulneravel-VPU.
(Juvenal/Siso)
