Dili – Parlamentu nasional autoriza prezidente republika Jose Ramos Horta viajen ba Australia no Nova Iorke, iha fulan setembru ne’e.
Rezultadu votasaun husi membru komisaun permanente ne’e aprovadu ho votu a favor rua nulu resin nen, kontra no abstensaun Zero.
Prezidente parlamentu nasional Aniceto Guterres Lopes konfirma, iha vizita ba Australia xefe estadu sei hasoru ninia omologu primeiru ministru Australia Anthony Albanese hodi diskute kooperasaun bilateral no partisipa mos aktividade balu iha kambera no Sidney.
Xefe orgaun lejislativu ne’e akresenta, xefe estadu nia viajen ba Nova Iorke ne’e sei partisipa asembleia jeral nasoens unidas no enkontru seluk relasaun ho asembleia jeral nasoens unidas ninian.
Xefe estadu sei viajen ba Australia iha loron tolu to’o loron sanulu resin ida no viajen ba Nova Iorke estadu unidus amerika iha loron rua nulu resin ida to’o loron tolu nulu fulan setembru ne’e.
(Bitu/Siso)
