Dili – Tribunal distrital Dili sei notifika ministra negosiu estranjeiru no kooperasaun Adalgiza Magno, iha tempu besik.
Notifikasaun husi tribunal, ligadu ho petisaun inisial ne’ebe eis konsulado jeral Australia Luciano Conceicao aprezenta ba tribunal.
Eis xefe representasaun Timor-Leste iha Sidney Australia, Luciano Conceicão “Timor Maubere” husu ministra atu hatudu faktus konaba informasaun ne’ebe governante publika iha media sosial.
Tuir nia, ministra publika kona-ba, eis konsulado jeral Timor Leste iha Australia troka numeru konta bankaria hodi difikulta servisu transferensia osan ba Australia.
Defensor publiku, Sergio Paulo Dias Quintas hateten, kodigu prosesu sivil artigu 359 numeru um hateten, kuandu laiha motivu ba petisaun inisial iha rekezitus hotu ba tribunal.
Hafoin liu loron tolu nulu, la iha kontesta maka tribunal konsidera katak, faktu sira ne’e los hotu no sei kondena parte kontrariu atu selu indiminizasaun ba autor tuir norma prosesuais.
Iha loron 4 fulan outubru tinan ne’e, eis konsulado jeral Timor Leste iha Sidney Australia, Luciano Conceicao “Timor Maubere” ho nia defensor publiku Sergio Paulo Dias Quintas aprezenta ona petisaun inisial ba tribunal distrital Dili.
Ligadu ho lia falsu, ne’ebe governante refere fo sai iha grupu media nasional-GMN iha loron 19 fulan marsu tinan 2021.
(Juvenal/Siso)
