Dili – Deputada Fernanda Lay husu komisaun parlamentar infra-strutura atu bolu urjenti operador telekomunikasaun tolu hodi justifika liña internet lao tarde.
Tersa feira ne’e, iha intervensaun deputada bankada CNRT Fernanda Lay hateten, liña internet husi operador sira lao tarde, tamba governu la halo kontrolu maximu ba operador telekomunikasaun sira.
Tamba ne’e, membro orgaun lejislativo ne’e husu komisaun E parlamentu nasional atu bolu urjenti operador telekomunikasaun Timor Telekom, Telekomsel no Telemor hodi justifika failansu ne’ebe akontese ba liña internet.
Maibé, presidenti interino komisaun E Faviao Oliveira deklara, antes ne’e komisaun halo ona audensia ho lider operador telekomunikasaun tolu, maibe solusaun ba liña internet presija aselera kabel sub marino husi Australia mai Timor Leste.
Foin lalais ne’e, diretor Timor Telekom, Manuel Carceres deklara, operador telekomunikasaun tolu sei aumenta kapasidade torre kada munisipio hodi fasilita utilizador sira ho lais.
(Alau/Siso)
