Dili – Komisaun parlamentar asuntu infra-strutura halo audensia ho operador telekomunikasaun tolu hodi buka solusaun ba preokupasaun publiku ba liña internet.
Presidente interino komisaun E, Favião Oliveira hateten, komisaun konvida operador tolu hodi halo audensia, tamba publiku preokupa ho liña internet ne’ebe lao tarde, difikulta utilizador sira nia servisu.
Tamba ne’e Parlamentu Nasional husu ba operador Timor Telekom, Telekomsel no Telemor atu hasae kapasidade internet hodi bele fasilita utiilizador sira.
Diretor Timor Telekom Manuel Carceres afirma, atu garante liña internet ho lais iha Timor Leste, governu presija aselera prosesu fibra optika husi Australia mai Timor Leste.
Tuir Manuel Carceres, dadaun ne’e internet lao tarde tamba operador sira uja satelite hamutuk ho nasaun seluk.
Durante audensia, parte rua deklara atu servisu hamutuk ho govenru hodi aselera prosesu fiber-optika mai Timor Leste, hodi hadia liña internet ba utilizador sira.
Dadaun ne’e, ekipa tekniku husi operador tolu sei aumenta tore iha kada munispio hodi hasa’e kapasidade linha internet hodi diak utilizador sira.
(Alau/Siso)
